علامات النصر

علامات النصر

٠٠٠٠٠٠

قاسي مُدرِّبنه اشكُثر

عالمصطبه مخليني

واعَدني والموسم خلص

عافيني لو ناسيني

موهيچ عيني اليختبر

بس شوك ومروره الصبر

تحرمني ليش من الحصص

والغشمه شبعت بالفرص

قاسي اثاريك وصَلِف

شَفّاف حسبالي وترف

عالمصطبه مخليني

٠٠٠

جَرّبني وامنحني الثقه

تصفگلي وتگلي شبقى

فنان خطره اهدافك

بيديك وتراوغ حلو

تسجل خطف بشفافك

وقِّع حبيبي عالعقد

عُمرين رايد لو عُمر

دنيانه لعبه من صدگ

خلينه ناخذهه غدر

تتواطا ليش ويه الحكم

والفرحه تگلبها ألم

عالمصطبه تخليني

٠٠٠

نَزِّلني بس مرّه وشوف

اگلُبلك الملعب گلب

فرحان تطلع منتشي

ماتنسه للموت الغلب

لعب الصعب يغريني

ماريد فاصل راحه

اربع اشواط بلا تعب

وحدي نجم بالساحه

ليش ياروحي اشصار

لعبك صفى ويه لزغار

رجعني عالتشكيله

فارسنه بعده بحيله

يحسبلي حساب الخصم

وانت تعاملني بظلم

عالمصطبه تخليني

٠٠٠

حِسدوني كل الشطار

ولامرّه ماخِذ انذار

اسال عليه الجيران

لبنان كلها ويران

لعبي نظيف وراقي

الجمهور صاح عراقي

مبينه علامات النصر

حلوات تبعني اشكثر

شتريد مني وك بعد

علّيت رايات البلد

وانت ولاچنك عرف

قاسي اثاريك وصلف

عالمصطبه مخليني

عالمصطبه عالمصطبه

مخليني

عبد الكريم صالح العامري

اميركا پنسلڤينيا

تنويه: جميع المقالات المنشورة تمثل رأي كتابها فقط
Read our Privacy Policy by clicking here