چـا ليـش
ميسون نعيم الرومي
حبيتك اوضاع العمـر – والعمـر مـَـيـرِد اردود
بلبـل يغني اوبالقفص – غـنوَة حـِزن لن مصيود
ايام راحت وانگضت
واسهامك ابگـلبي رمت
ضيم اوقهر.. منك شفت
تردس على اضلوعي ولك – حب الغدر عيب ايعيش
چا ليش يشـگـَـر؟
چا ليـش؟
***
كل الطيور اتـرد ولك – وانـت ارحلت مارديـت
لاخبـر منك يوم اجه – اولا طارش انـت الوديـت
هايم على درب الهوى
مغرور يالكلك غوه
وابغيبتك گلبي انچوه
العين تربي الجيتـك – وابفرگتك مامش عيـش
چا ليش يسـمر؟
چا ليـش؟
***
حنطاوي يالون الذهب – ياعـَـسل مايـع بالشـَـمس
حبك قدر جاني غفل – انت النـَـفـِس ويـه النــِفـَـس
بسك ولك گلبي تعب
مابـيـَّه .. مليـت العتب
دمي نشف .. هاك الگلب
عالي ولك مـوج البحـَـر – غرگان يتمنه الگيش
چا ليش يشگر .. چا ليش؟
بسك ولك يسمر .. ليش؟
چا ليش
———————————————————-
آب / 2018
ســــــــــــــــــتوكهولم
تنويه: جميع المقالات المنشورة تمثل رأي كتابها فقط