الدنيه كله ظلم – شعر شعبي

الدنيه كله ظلم
شعر شعبي
الدكتور ابراهيم الخزعلي
من اسمعت هالنعي
نزفت عيوني دم
الطرب عدنه بچي
مثل العزه بمأتم
يا خويَ گلّي شوكت
نرتاح نتنعم
الدنيه كله ظلم
من ظالم إلْ أظلم
اوكلما أخيّط جرح
بوجهي يطش الدم
مو بس جرح بالگلب
لتگلّي هيه اشچم
لا والله ماتنحسب
بس الله بيه اعلم
آنه أبچي من لوعتي
آنه أوِن من لوعتي
واصحابي تتبسّم
ما ظل بعد كل صدگ
ولا واحد اليرحم
والچذب اصبح قِيَم
هو الذي يحكم
الصار بينه وجره
اولا واحد اتعلم
من چان یحکم نذل
وازلامه ما ترحم
اليحچي گالو حچه
والسكت ما يسلم
دنيانا چانت سگم
اوما يوم ما بي دم
شنهو العمل يا تره
شلّه امسربته تحكم
يا وسفه هذا الزمن
حتّى الحلم حَرّمْ
والمايهاب الليل
مات بغربته محطم
الوكت صوچ الوكت
ويّه الظالم تحزّم
والمظلوم..
بين الماضي والحاضر
يشبع قهر
يجرع سم
************

تنويه: جميع المقالات المنشورة تمثل رأي كتابها فقط
Read our Privacy Policy by clicking here