المسؤول العراقي يقول [ والله ما اعوف الوزاره
والله ما اعوف الوزاره
_____
شعر: عباس طريم – اريزونا
_____________
لو الحرب الاوله ترجع
لو يصيح ابصوت , مرجع
لو إمام الكون يطلع
بيده يطيني اشاره
ما اعوفنه الوزاره
+ + +
لو ابوي ايموت يمي
وتنشنق جدامي امي
ويندفن خالي وعمي
وجدي ايهـــدمون داره
ما اعوفنه الوزاره
+ + +
جنت من الفكر تالف
عاللحم والتكه حالف
والسمج بس بالسوالف
ما شفت فد يوم ناره
شلون اعوفنه الوزاره
+ + +
انه راضي وموش راضي
وابد ما انقل غراضي
ما اصيرن فعل ماضي
وانحسب ضمن الفقاره
ما اعوفنه الوزاره
+ + +
عندي بس مليار واحد
ما اجذب , الله شاهد
فدوه خلوني اجاهد
من اجل اهل الحجاره
شلون اعوفنه الوزاره
+ + +
آنه والعباس أصلي
وما أحب سعدي الحلي
تريد أطلع وين أولي ؟
واللحم صعدت أسعاره
شلون أعوفنه الوزاره
+ + +
لايــِك الكرسي عليه
ولازمه ابحلكي اوبديه
حتى لو كرصتني حيّه
اوسمهه يوصل للمراره
والله ما اعوف الوزاره
+ + +
عندي سوك اوصار باسمي
ومطعم امفتحينه رسمي
يغني بي دوما الجسمي
وبالرشيد املك عماره
شلون اعوفنهه الوزاره
+ + +
الشغله مو شغلة عواطف
انه بالعباس حالف
ما اريد اصبح مخالف
والسياسي اصبح شعاره
والله ما اعوف الوزاره
+ + +
لو يموت الشعب يمي
وينسفك من صدك دمي
ما اوخر , هذا عمي
شافلي بالاستخاره
صعبه اتركهه الوزاره
+ + +
شعر
عباس طريم