من قتلني ؟ منو هذا اللي قتلني؟؟

*من قتلني ؟
منو هذا اللي قتلني؟؟
ميسون نعيم الرومي
نسأل احنه اليوم عنهم – منو هذا اللي قتلهم ؟
گلوب ترفه اوكلهه طيب – حبوا اوقدسوا وطنهم
شموع كلهم فدوه الهم – فرحة الدنيه اسمهم
يا ولدنه ياشباب – انظفرت انجوم ابگذلهم
شحچي شوصف بالجمال – گمر يمشي وابأثرهم
عيون تلمع چنهه كهرب – والشمس لاذت ابسدهم
هتفوا او صاحوا (عراق) – شهدت الناس ابسلمهم
مجرم اوسافل عميل – (احزاب) تكتل يا جرمهم
نهبوا اوباعوا وطنه – بالجريمه شركه كلهم
ذهب نفط اوكراسي – فرهدوهه كلهه الهم
حرگوا اگلوب الأمهات – و(الشبيبه) سال دمهم
نبقه نطلب بالعقاب ! – لذة العيش الحرمهم
ساسه كلكم بره بره – اشبعنه ملينه چذبكم
والقضاء الفسد وسفه – يلگي اعذار الجرمهم
يا ولدنه يالعزاز – للوطن ضحـَّوا ابدمهم
شعب نايم يمته يصحه؟- يحمي ولده ايلوذ عنهم
غسل دم اودفن موته – شغله صارت سهله عدهم
مرض جوع ! اوعذاب – سكته ترضون ابألمكم
دجله يبچي والفرات – نجده يطلب والله منكم
نشف مايه او يشكي الكم !!
يشكي إلمن ؟ يشكي الكم…..
——————————————————-
# حملة من قتلني ؟ :- تضامنا مع ثوار تشريرن في صرختهم
من قتلني ؟
———————————————————–
المجد والخلود لشهداء تشرين
والقصاص العادل للقتله
————————————————————————
20/ آيار / 20212
ســــــــــــــــــتوكهولم

تنويه: جميع المقالات المنشورة تمثل رأي كتابها فقط
Read our Privacy Policy by clicking here