أبوذيات ذات حِكَم
د. حسن كاظم محمد
خِلَقْ رَبَّك نَحَلْ وِنْطاه مَنْحَل
خِلَقْ وَرْدَه عَلَيهَه يْدور مِنْحَل
رَحيقِ الْينْتِجه مَحْلولْ مِنْحَل
لْعَسَل وَرْدَه مِن نَحْلَه وْخَلِيّه
******
رِزقَـكْ بِالْسِمَهْ وِالْأَمُر مَوْعود
كِلْمَنْ يِحْسِدَك بِالْعَين خَلْ عود
وِذا صادَفْ طَريقَكْ گِلّه ما عود
وْسَمِّي بْرَحْمـِتَه ترفع أَذِيـّه
******
سِـمَعْـتَه عَـن بِعِدْ ظنَّيت هُوّه
يِوَگّعـني بْمُصِيـبه وْبَعَدْ هِوّه
وَظَلَّـن أَحِبْ وَتْحَمَّلْه أهْوَه؟
طَبُعْ هَلْ وَكِـتْ ماإِلْهُم سَجِيّه
******
بَرْدِ الْصُبُح گال الْمَـثَل بِي گَرْصَات
لَو صاَبَكْ مَرَضْ أِخْذِ الْحَذَر كَرْصَات
أَحَـضِّرْ لَك خُـبُزْ تَنّور وَي گُرْصَات
گَـيمَـر حِـلّه خبز وعَـسَل صُـبْحيّـه
*******
لَؤُلَؤُ أَبْيَضْ لا أَقَـدْرَنّه وَحِسْبه
آنَهْ اْقَدْمَه للحبيب إلإ لَه حِسْبَه؟
آنَهْ مُو يَم حاسِدِ لِي عِـنْدَه حَسْبَه
آنَـهْ مو يَـم شامِتْ وْيِحسِدْ أَخَـيّه
******
ظالم ما حُـكَـم وِستمـر ظُـلمه
ولا طـول العُـمر باقِـيَه ظَـلـمه
تطلع شمس لحظه تزول ظَلمه
ويطلع گُمر يضوي عَـل بَـريّه
******
كافي بعد مِنُو خالَه وْعَـمامَه ؟
كافي بعد شْـتِلبَس مِن عِـمامه ؟
كافي بَـعَـد مِـنو لْـبِيبي وَمـامه
گِـلّي شِـعْـمَلت إذا عِـندَك حَمِيّه
وإلى اللقاء
تنويه: جميع المقالات المنشورة تمثل رأي كتابها فقط