قصيدة/ إستفد من تجارب الآخرين

قصيدة/ إستفد من تجارب الآخرين

د.حسن كاظم محمد

خَل أنَبهَك فَـكِّـر وْإسْـمَع كَلامي

كُل خطأ عِبْر الْزمَن مِنّه سْـتفيد

وخِـذ رَأي الآخَـر وْلا تسْـتهـيـن

لِأن أهْـلِ الْمَعْـرفه عِدْهُم رَصيد

*****

رَبَّـك لْيمْهِـل وَلا يهْـمِل بَـشَـر

وْنِـطَه لِلْتوّاب فسحَه مِن جديد

لاچِن حْسابَك دَقـيـق وْمُنتَـظَـر

ما يْـقِـل مِثقـال ذَرَّه وْلا يـزيـد

رَبَّـك انطـاكِ الْـرخاء وْذَكَّـرَك

بْوَكِت أيّام الفُگُـر دَوْرك مُفيد

*****

ناس لا تسمع ولا عَـين تّشوف

لا تريـد تساعـد وْلا تنـطي إيـد

ويـن عـقـلك ألله ناطـيـك الفِكِـر

عَـمَل الصالح هو الرأي السديد

إبتعـد عنِّ الچـذب حَـبله گِـصير

وِتْبع الحقْ وَبَـد عـنّه لا تِحـيـد

*****

لو سِمعت لْجار جنبك يستغيث

عونك تْگلّه حاضِر لَـك عَـضـيد

كلمة لمعْـليّه ما حـلت قـضيّـه

وگلت بس آنه والآخر شَـريـد

هِـيّه دِنيه يومِ لَـك بُكره عليك

تْحمّلت شدّه يِجي يومَك سَعيد

*****

خل أنَبْهَـك عَـن بَخيل وْخِسَر دِنْيَه

تالي يگضي العُمر مِـتنـدّم وحيد

لَو شِفِت مِحْتاج يَطلُب مَرحَمَه

دوم أدّيـله الطلـب لَـتْگـلّه عِـيد

شوفه للمغرور عايش في برج

عاجي حسباله الأجَل عَـنّه بعيد

خْـل أنَبْهـك إقْـره وِفـهَـم وِنـتبِه

وَيـن صـار الْـيدَّعي مَجـدَه تَلـيد

إتـْرُك الأحـمَق بِـلا گـول وجَـدَل

دائِماً في مَي عَكِر شِصَّه يـصيد

عاشر لطَـيَّب گًـلُب مِـنَّه سْتفـيـد

چَـن أهَـمّيـته مِـثل حَـبْـلِ لْـوَريد

وإلى اللقاء

تنويه: جميع المقالات المنشورة تمثل رأي كتابها فقط
Read our Privacy Policy by clicking here