بمناسبة قرار تعدد الزوجات .
بمناسبة قرار تعدد الزوجات .


بقلم: عباس طريم - 14-03-2017
بمناسبة قرار تعدد الزوجات .

_________________
اشمال البرلمان ايدك عله الضره

ايريد ايبربد اعيالي , دهر فره
__

ما عدهم شغل ردوا عله النسوان

وكالو ياشعب , حك الرجل اثنان

أول ما سمع , زين حفر خشان

وظل بالسوك لازك , من فلك طره

+ + +

من يوم السمعهم خيه ظل ايحوس

مو خشان ذاكه , اتكول جن طاووس

جان امحدب اويمشي بلايه اضروس

هسه ايمشط ابراسه الف مره .

+ + +

خيه الزلم .. كلهم طلعوا امبدلين

جن نسوانهم ميتات , من اسنين

من سمعوا مثنى, الكل هتف امين

يوم العيد , يوم انعيده الكره

+ + +

من سمعوا يخيه , صاحت الصيحه

وطلع خشان يركض , طاح بالجيحه

انشك قاطه وقميصه, الحط عليه ريحه

واجاه عبود , من ماي الوسخ جره

+ + +

خيه ارجالنه وللحرب متحضرين

وايكولون : موش احنه, يكول الدين !

نتزوج ثلاثه , وعالاقل اثنين

شمالج يم زبون وخلف , محتره .

+ + +




يهل البرلمان , اشلون تتهنون

لو عرس امناتي وثنه , بيه اشلون

وياكم حاطه , اسباهي اوبخت حنون

يخلي اعبادي , يشحتكم شحت بره

+ + +

طركاعه واجتنه , اشلون يعليه ؟

ابوج ايريد يتزوج مره , اعليه

انجان انه يتيمه , وصدك علويه

يبربد هالقرار , ويعمي القره

+ + +

ام شلتاغ صاحت , خاله شنهيه

خل نهجم عليهم هجمه بريه

وليعرس علينه , اوروح دبيه

انشحته امن المجر , لحدود سامره

+ + +

عباس طريم



Advertise on Sotaliraq.com? Click here for more information!

Copyright © 1998-2017 Sotaliraq.com - All rights reserved / جميـــع حقـوق الطبع والنشر محفوظة لصوت العراق
Home | News & Reports | Articles | Privacy Policy | Contact Us

Google