اني كلش فرحان بامريكا ومتونس
اني كلش فرحان بامريكا ومتونس


بقلم: محمد العبد الله - 23-03-2017
تره اني كلش فرحان وهوايه فرحان بامريكا ويومية اشوف مسؤول امريكي والتقي بواحد عمري ما حلمت اشوفه مو التقي بي ويحجي ويايه ويطبطب على ظهري .
من هلكد فرحان ما اكدر اضم الضحكة و الابتسامة من حلكي لان وين اكو هيجي فرصة تجي ؟
شكد حلو لمن وكف الرئيس فوك راسي واني كاعد على الكرسي وهو يكول ها حباب شنو دتسوي ؟ واني مثل الشطار اكول لعمو الرئيس اني دا احفظ تعليماتك وشلون فرحت لمن خلّ ايده على جتفي وكال عفية عفية انت صدك ولدنا .
هوايه توّنست لان يومية اقابل هوايه وكلهم يحجون ويايه مو ويه غيري ولو بيدي ما ارجع .
جماله هذا وزير خارجيتنا عباله اني اخليه هو يحضر اجتماعات وزراء الخارجية هههه شلون عقل اعوفه هو يروح لا لا ابدا ما خليته يروح وصحيح هو اجتماع لوزراء الخارجية بس واني رئيس وزراء بس شلون ما احضر ؟ هذولة فوك ستين وزير خارجية واني بيناتهم لا والله ما اخلي احد يحضر واني رحت واهم شي وكفت يم عادل الجبير وزير خارجية السعودية وشفتو شلون جنا نضحك ؟؟ ايباخ شكد حلو هوايه حلو جان وهمزين ما خليت صاحبنا يحضر وصحيح هو زعل بس خلي يزعل شنو اسوي ؟
هسه لمن ارجع منو يكدر يحجي وياية ؟ كلهم شافوني ويا الرئيس والسيد النائب وكلهم يعني اني هسه صدك محمي وظهري قوي اني كلش فرحان وهوايه هاي السفرة جانت حلوة .
هومّ واعدوني يخلوني ابقه اربع سنين لخ وكالوا هوايه يكرهون اللي قبلي واكيد ما راح يخلوه يرجع بس اني راح احاول احفظ شنو كالوا واطبق كلشي يردون .
يا ناس اني هوايه فرحان بامريكا وكلش متونس .



Advertise on Sotaliraq.com? Click here for more information!

Copyright © 1998-2017 Sotaliraq.com - All rights reserved / جميـــع حقـوق الطبع والنشر محفوظة لصوت العراق
Home | News & Reports | Articles | Privacy Policy | Contact Us

Google