بقلم: عباس طريم -
13-04-2017 ما نكدر نقيس الذيل , بالراس
_____________________
ما نكدر انقيس الذيل , بالراس
ولا اخدود الجبل , تنقاس
بالساس
+
ولا بالينهزم .. وكت الملمات
مثل فارس , ايجود الكطع
النفاس
+
ولا كلمن ابوه خير , طلع زين
ابوه خير عماد , اوملته
الناس
+
ولا كلمن تعب , في دنيته اينول
ركض كل عمره راضي
اوطاكه افلاس
+
ولا كلمن لبس , ربطه , ولبس قاط
كشخ , والناس كالت عنه
لباس
+
ولا كلمن شراله اسلاح , صياد
ولا كلمن ينيشن عالهدف
جاس
+
ومو كل الحجر , من يلمع انكول
واضح , من لمعته البيه
حجر ماس
+
ومو كلمن كتب , بالشعر بيتين
ببن سيد خلف , عريان
ينقاس
+
كتبت امن الكصيد .. اشكال والوان
وما كلت انه امير الشعر
عباس
+
اليدوس الناس , ويدور حزازات
يجيه فد يوم بالرجلين
ينداس
+
يبن ادم تعقل , وافتهم زين
اذا طبيت , لتزاحم
الجلاس
+
واعرف موقعك , ان جنت سطرين
بالك ياحلو , اتزاحم
الكراس
+
رموز الشعر , ما وصو قريبين
ولا خلولهم .. عالارث
حراس
+
البصل , والكشره , ياهو الجاب طاريك
اتهد وتحلف ابراية
العباس
+
ظل بين القبايل , يصرخ ادخيل
اشحصل من غدر بكليب
جساس
+
ابتعد عن الرمز , لتلوحك النار
ولتحاول اتخلي الراس
بالراس
+
التريد اتناطحه .. اتحبه الملايين
ورمز للادب, من الراس
ينباس
+
+
انصحك .. لا تناطح جبل حمرين
اذا عندك شعور , وعندك
إحساس
+
عباس طريم
