بقلم: عباس الناصري -
30-01-2017 اول ما طب التلفزيون،اشتراه ابوي وچابه للبيت،النوب تعال چيب الشبكة وشدها،وفرها منّا ومنّا گول بالف يا علي،طلعت الصورة.
حبوبتي زنوبة،چانت گاعدة يمنه بالغرفة،من طلعت الصورة وشافت المذيع يسولف عالاخبار،ركضت وتگبعت بالعباية،وانطت گفاها للتلفزيون، وگالت-اتحاچي ابنها:افه عليك يمه اتطبب علينا زلمة غريب،واحنا مچشفات عود هاي لابسة شيلة وثوب طويل!!
حبوبتي؛ متخلفة وعقليتها رجعية،لا متحضرة ولا متطورة،هم عايشة بالعشاير وهم محافظات!! شنو شيلة وعباية؟! وشنو زلمة غريب؟!هسه الزلمة يستحي والمريّة ما تستحي! هسه لبس البدي،والحصر،والسلفي، هاي بعد عملية التطور الجسمي، من تكبير مقعد الغائط،ومخرج البول،ونفخ الشفايف مثل القرد،لئن حبوبتي ما چانت تعرف اصلنا القرودة!!
النسوان انواع واشكال،بيهن الطاهرات ،وبيهن العاهرات،وهذني"العاهرات" هم صنفين"الكحبة والوكحة"،واذا ما مصدگيني ذاك ابن منظور بلسان العرب،روحو وأسألوه شوفو شيگللكم عن العاهرة؟
اكو اثنين من النسوان،عايشات بمنطقة وحدة،وشارع واحد،وفوگها متجاورات حايط اعله حايط،وحده يسمونها: حمدية العورة،والثانية: حسنية الوصخة،ذني سابيات العالم باللسان،يفرشن افراش ويگعدن اباب الحوش،من طلعت الشمس لحد مغيبها،ويتغامزن عالرايح والراد، والناس تتحاشاهن وتتكفى شرهن، مو الحكمة تگول:(شرّ الناس من خاف الناس لسانه).
حجي كامل،رجال تاجر،يبيع ويشتري بالدجاج الجملة،يسكن بنفس الشارع، وحيل ضايج من حمدية وحسنية، فد يوم گال بينه وبين نفسه:ليش ما أشغلهن عندي،هم مفتك منهن،وهم مخلص العالم من شرهن،وهن يفيدني بالبيع والشره،صاحبات ألسان ووكحات!
حجي كامل،حاچاهن بالشغلة،كيفن بيها ومثل الما مصدگات،عاد گول اشتغلن اول يوم،وگام الحچي يذب ويحسب اعليهن دجاج،ومن خلّصن جابن الدخل واجن لحجي كامل،هن محسبات يحصلن اربع ادنانير،كل وحده دينارين، من حسب الحجي الدخل،طلّع بس افلوس الدجاج،وما كو بيه ربح!!
اهنا صارت الطلابة،حمدية وحسنية اتهمن الحجي،وگالن انت زغلطت اعلينا بالحساب،وبگت ربحنا وتعبنا،وتشوف الحجي يحلف ويرجع لوره،وهو هم اتهمن وگال وحده من عدچن هي البايگة،ما اطول اعليكم السالفة، اشتدت المعركة،وما صفت الا يرحون لسيد جودة يحلفون.
اتفقوا على باچر من الصبح يحلفون بسيد جودة،والسيد معروف بالشارة، اجه الصبح وطلعوا اتلاثتهم، اشو ابنص الدرب،وحسنية گالت:(آنا نسيت اثاري صرفت من الدخل دينارين!)،حمدية هم گالت نفس الحچي،عاد اهنا گال حجي كامل:(چا بوية المن بعد رايحين نحلف، اشو البوگة طلعت عدچن،من ألعن ابوچن يا ابو شرفچن، مو صوچن صوچي انا شغلت عاهرات وياي)!!
هسه عدنا امريّتين يشتغلن بالسياسة، سالفتهن سالفت حمدية العورة، وحسنية الوصخة،خبصن الدنيا بالتلفزيون على العبادي،شلون يوقع على اتفاقية خور عبدالله،وطلعن هن مأيداتها ومصوتات اعليها بأيام المالكي من وقع اعليها!!
الله يرحم حبوبتي زنوبة،ويرحم والديكم،لو شايفه ذني المريّات طالعات بالتلفزيون،چا گامت تتفل بزيجها وتگول،يمه برد برد،نسوان گاعدة بنص الزلم الغربة وتسولف وياهم،دخيلك ربي! سترك ربي! چا ما عدهن ابو.. اخو.. يردهن .. ماكو خيّر يصيح اعله ذني العويهرات؟!
