العراق ابخيت وابراسه الف شاره

العراق ابخيت وابراسه الف شاره
____________________

شعر : عباس طريم

العراق ابخيت وبراسه الف شاره
والياذيه لابد تنهجم
داره

من الفردوس مخلوق النخيل البيه
ومن جنة عدن مخلوقه
اشجاره

شجاع وشهم حر ويشهد التاريخ
والاحرار واهل الغانمة
اخياره

شيعة وسنة والاكراد والتلكيف
ويزيدية ومسيح وصابئة
انصاره

بغداده جميلة , وبصرته الفردوس
واربيلة مصيف, وجنة
انباره

اليكولون طاح ,وبيه ما ظل حيل
ذولة وداعتك ياخوي
عياره

جبل عالي اوعمره ابعمر هذا الكون
والتاريخ هو الرفع
انواره

اذا ناده المنادي الساحة الميدان
ركْضت للمناية ازغارة
واكباره

بْدمّه الكرم يجري ويختلط بالروح
والديوان باقي وما طفت
ناره

اشجع من سبع ضاري الضعيف البيه
واكرم من عدي وحاتم
اشراره

عميد ايظل رغم كل المصاب البيه
لان ربك عميد العالم
اختاره

اليريد ايشوف كتلات العراقيين
والتارة يهد ,وينثني
تاره

يجي ويشوف ويقرر من المطلوب
وراح ايشوف امام العين
صكّاره

يظل راس العراق ابكل وكت مرفوع
ما دام الغيارى البيه
ثواره

بلاد الخير فاض وغرّك الجيران
كاعه اتجيب توم وتهطل
امطاره

ربك بارك اترابه وشتال البيه
وبارك كل مياهه وبارك
انهاره

ناسه اتزيد لو كل ثانيه تفجير
واجيوشه تظل اجيوش جرّاره

يخوفون الاسد من هجمت الفيران
وهم شفتو اسود اتخاف من فاره

العراق البيه حيدر ما يمرّه الضيم
ما مونه تظل رغم المحن داره

والبيه شمعة الزهراء ابو الاحرار
حسين البالضريح وينطي خطّاره

والعباس بيه وكاضي الحاجات
وال البيت ..ياهو اليوصل اسواره

سيّدنه المعظّم بيه ,ابو الوكفات
يرجع باليريده واكثر ..الزاره

وعبد القادر الشيخ اليجوه ماشين
من أهل الهِنِد والصين وامصاره

اقمار وبنوا عبر العصور الدين
هله بعز العراق وهله باقماره

رجال اتعوّدو جيش العده ايخلّوه
من بغداد لليابان
طشّاره

حذاري من الاسود ابساعة الشدات
من طيبين .. ينكلبون
جزّاره

العدو ايعصْرونه مثل الخوخ والرمان
بحوافر خيل ,موش ابوسط
عصّاره

وليلزْمونه ما يدري الطريق امنين
وكل ما يسال ,ايجاوب
طرا طاره

واليغير اعله ارضهم ما يشوف الخير
غاراته يردّوهه ابالف
غاره

شعب للمعتدي الغازي ابد ميلين
ويطرْدونه مو بالسيف
بحجاره

ربك حامي هذا البلد من كل سوء
وسْماه البخيت ,وحطله الف
شاره

Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close