أين رواتب المدرسين والمعلمين يا وزارة التربية ؟

بقلم : عباس الخفاجي

امي تخربطت بالليل
وماعندي سياره أوديهه للمستشفى فـ خابرت ابن جيرانه الاثول لأن عنده تكسي
گتله فلان تعال هسه عندي حاله طارئه..
گال:منو إنته؟؟
گتله:عباس جيرانكم..
گلي: ياعباس المطيرچي؟؟
گتله:لا عباس جيرانكم الوراكم..
گلي:عباس أبو المولده؟؟
گتله:لا يمعود عباس الوراكم حايط ع الحايط..
گال:هاااا..عباس أبو شعر النكرو ؟!
گتله:إي
گال:خير..شعندك؟؟
گتله:الحجيه تخربطت بس تعال نوديهه للمستشفى بسرعه..
گلي: يامستشفى؟؟
گتله: مستشفى النعمان
گلي:ليش مو مدينة الطب اقرب؟؟
گتله:هسه وين ماچان بس خلصني تعال..
گلي:أحد وياك لو بس الحجيه؟؟
گتله:هو بس آنه وياها بالبيت قابل أجيب البزازين ويانه؟! رحمه لأهلك بس تعال..
گال:أبدل ملابسي لو أجي بالتراكسوت؟؟
گتله:أدري رايحين خطابه ؟؟؟ البس أي شي ..
گلي:شوكت تريدني أجي ؟؟
گتله: تعال يوم (الثالث) الحجيه ماتت … أشتعلت صفحة أهلك…
رباط سالفتنه : المعلمين والمدرسين يقبضون راتبهم يوم 25 من كل شهر ….. واليوم سته بالشهر وما أستلموا راتب شهر 11 … وأكيد ابو المولدة كطع عنهم الكهرباء وأبو البيت واكف يداعي بالأيجار … والديانه كلها واكفة براس الشارع تنتظر واحد منهم يطلع وتداعيه بالدين والله يساعد الي عنده مريض وينتظر الراتب حته يراجع طبيبه …. والجماعة ولا يمهم الشغلة.
أكيد الجماعة مشغلين فلوس الرواتب وديربحون بروس المدرسين والمعلمين والا شنو معنى تأخير الرواتب 11 يوم والعالم على كد حالها يا دوب مكفية يومها … ويكلك راح نحارب الفساد … اكو اكثر من هذا الفساد يا عالم ؟؟؟؟
من أشتعلت صفحة اللامركزية الأدارية الي لعبت بالناس طوبة

……

Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close