بمناسبة قرب الانتخابات العراقية _ حفظها الله ورعاها))

بمناسبة قرب الانتخابات العراقية _ حفظها الله ورعاها))

عباس طريم

حجاي واجانه ابقاط وبربطه

يراوينه الذهب ويبيعنه الحنطه

حديثه امبين امنقيه ومضبطه

جميل وشاعري وما بيه كل غلطه

وراه ازلام كل واحد جهاز اوياه

ونظارات سودة امظلله وجنطه

وقاط اسود ابوسطه احزام من احزام

والورور امبين لازك ابوسطه

يتلفتت .. وعينه ادور بين الناس

وكلمن يوصل العد صاحبه ايلكطه

ما جنهم حرس , جنهم اذيابة ليل

متحضرة السفك كل جدم يتخطه

سولف عن الود والدين والاخلاق

وعن رب العباد ورحمته وسخطه

وكال اني رقيق وعندي بالبستان

عصفور وغزال وبلبل وقطه

افرح من اشوف الفارة والبزون

وارتاح امن اشوف البشه والبطه

انساني , وحقوق البشر والحيوان

اتحلم انام ابظله واتغطه

احنه اهل النفط والمال , والمفروض

نتريك زبادي وقيمر وقشطه

والعرموط والتفاح والرمان

كله انجيبه حد البيت وانصفطه

وكال احنه العراقيين كلنه اخوان

نعدل اللي يزل , ونسامح اليخطه

يشهد ربي بابي وكلبي مفتوحين

الكم بالاخص اليوكع ابورطه

بلا موعد تجوني وانتو اهل البيت

وانه اللي يقدم الزاد ويفرطه

والعنده سجين وحار وين ايروح

لا يحتار , احنه انطلعه اله ابشخطه

اعاهدكم من اذنه انجيبه الستقرار

وانجر الامن من زيجه وانضبطه

والماخذ قرض ويشوفه حيل هواي

لا مانع لدينا سادتي انقسطه

والشارع البي طسات , من هالعين

واجب نفرش السبيس وانبلطه

اني اترشحت للبرلمان اليوم

عونتكم اريد الواضحة النشطه

واللي ينتخبني ابشرط , من هاليوم

اوقعله واكول اموافق ابشرطه

واللي ينتخبني , اولاده ينقسمون

نص عالجيش اعينه , ونص عله الشرطه

واليرشحني وايخط اسمي ما انساه

احفظ موقفه , واتشرف ابخطه

ذكر كل النقاط التعجب الجمهور

ما ظلت عليه تعتب ولا نقطه

اخيرا حمل روحه وصاروسط الناس

اشر للمصور , كال اخذ لقطه

ورشحناه وصار ودارت الايام

وخلصهه المرشح سنطه في سنطه

راح حسين زاره ودك عليه الباب

واخذ وياه الفايل حطه جوه ابطه

وكلما يسال يكلوله ما موجود

زار القاهرة ومجتمع في طنطه

وبعد مدة رجع وحسين يترجاه

محمل فايلات من الربع صفطه

حسين امتاني ما يتحرك امن الباب

ما دام الفلافل يمه والشطه

طبوله الحرس , كالوله حجي حسين

لازك سيدي شتامر شني الخطه

شتامر سيدي , ندعوه يشرب جاي

وانشيله اعله راسه بحوضنه انغطه

لو نطيه درس كل عمره ما ينساه

وانحطه اعله راك الباب وانربطه

شتامر سيدي انعنع اضلوعه اتريد

لو دفره اوعجل ونعيدله الخلطه

لو كلما يجي ويسال , اندفعه انكول

باليابان لو بالصين وانفحطه

هذا امسودن وصدك ابحجيك ذاك

يوم السولفت عالقطه والبطه

غضب جدا النائب , صار مثل النار

ظل يرعد رعيد وصاح من سخطه

اطردو كل بعوضه ايصير يم الباب

وياويله اليكول اشوزع وشنطه

صارت عندي جلطه من التعب , وحسين

وامثاله , سبب في هذه الجلطه

يوميه ابلد من اجل الستثمار

والاخ كاعد ابلا شغل يتمطه

وزعنه الشغل عالاهل والخلان

ما ظل عدنه شي ما يفهم الاسطه

قابل عدنه مكتب خاص بالتشغيل

كولو ابروح ابوكم وين دنحطه

بعد لحد يجيني انقلعو من الباب

والعباس كلمن يوصل انبسطه

وشرد مثل الغزال احسين لمن شاف

مجموعة اجته ورايده اتشحطه

وعاد الشهم حافي وصاح عالوصوه

عرايضكم اخذوهه ..اوصار بالوسطه

وصاح اباعله صوته اعله الجمع , ياناس

شحتوني ابتواثي , اصحاب ابو القشطه

والعرموط والتفاح والرمان

شو صارن تواثي وراشدي وسقطه

والما يصدك ابعينه يريد ايشوف

خلي ايروحله , ودين النبي ايسكطه

واليجرب , ادكن رهن انه اوياه

اذا مو كتله ياكل , تاخذه الشرطه

عباس طريم

Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close