( يبن فقره العراق )


( يبن فقره العراق )
قصيدة مهداة للشهيد الزعيم الخالد عبد الكريم قاسم رحمه الله
حامد كعيد الجبوري
14 تموز 2018 م

أبدي أمنين أبدي ويا شعر أرثيك
وأنه الشفت الزلم أقزام جدامك
تسع تشهر عدل (كيفية ) تطلك بيك
حمل شالت ثكيل أبثكل أحلامك
يبن فقره العراق و( قاسم) النجار
بجاكوج العراق أيبسمر أحلامك
شد صبر الفقير الصبرك النيران
شد صبر أبصبر وعكدها بحزامك

عشت بيا زمان ويا كتاب قريت
وأعرفت الحقيقة ورفت أعلامك
خليت العراق بعينك وداريت
وعلّمت الرجوله أدروس لزلامك
عفيف وطاهر ومخلص نظيف الإيد
ويحيل الدهر ما يلحك صيامك
مدرستك علي ومنهاج أبو الثوار
أبكثر حكمه العداله وأربعه أعوامك
عصب عينه الرذيل القاتل المأجور
وكابلت الرصاص عيونك لثامك
صحت عاااااش وتوقف كلبك الناعور
عدموا للعراق بيوم إعدامك

بقت أسرار نامت والزمن ميبوح
سكرتير الحزب وياك جدامك
مو قصدي الشهادة والشهادة تلوك
وبصدر الشيوعي وسامه ووسامك
( سلام ) وبينك أشصار وعاهدك عالموت
الشيوعي اللبس ثوبه من دمه أحرامك
( سلام ) الخله حزبه للوطن معبار
والدم للركب من هامته وهامك
( سلام ) بن الوطن راد العراق يصون
شعبه وثورته وأحلامه وأحلامك
تاريخك حزب وأثنينكم تاريخ
ما ينفصل سركم فكره وألهامك

أقارن بيش أقارن والمحال يكون
وللساع الفقير يعيش بنعامك
جم ثورة بنيت وجم قصور أسكان
وجم معمل يدور بعذبة أنسامك
وزعت القصور وما ملكت البيت
الويلاد الشعب ما كلت خدامك
بنيت شكد بنيت وما قبلت يكون
يتعنّون بأسمك واجب إكرامك
صوّرك بالكمر بكلوب كل الناس
وبحفره ذليل وعفن صدامك

,
Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close