خـرزة ســــحر


خـرزة ســــحر

ميسون نعيم الرومي

يا خرزة سحر للعاشگ اعيونك

برموشك تميت اوتحيي نظراتك

تمشي وابدلع مغرور من يومك

بالروح اوتشب لهبات نيرانك

چم دوب اولفاني من جفاك اشكال

اعاتب بالگلب يغفر ابزلاتك

وابهذا الزمن تهديلي حزن البيك

يالضعت ابدرب مجهول عنوانك

چا وينه عنوانك

***

امـْدگـْدِگ اچتافك وشم – احجاب هاذه اوطلسم

قداح واتـْعـِط بالدرب – سالوفة وامطرزه نجم

مدري شوصفك يا ترف – بوصافك ايحيرالقلم

وابغيبتك صرح العشگ – اتفلش اوطاح انهدم

چويات بالروح اوتظل – ماتنحمل .. كلهه ألم

لوعات .. إصْبـِر ياگلب – يوميه وابنفس النغم

الوانك القوس اوقزح – بعيونك اوترمي السهم

متگلي السبب .. متغيره الوانك

يالوين ارحلت .. چا معرفت عنوانك

چا وينه عنوانك؟

***

يبو تواليت واممشط صفح – والبكله چن شالت ذنب

هيمان بعيونك سحر – واسهامك اتصيب الگلب

لو عض على الشفه وفر – دم الورد ع الخد لهب

دلوع تتمايل غوه – يالمايع اميوع الرطب

البحه وابصوتك غنج – بلبل غرد حچيك عذب

طاير على اجناح الهوى – واليوصل الحدك صعب

هنياله لبحبك حضه – يا تين وايباهي العنب

غار الكحل من الهدب – ماتنوصف اجفانك

ياللي غبت – يالضيعت عنوانك

وديلي عنوانك …

———————————

9 / آب / 2018

ســــــــــــــتوكهولم

Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close