ميسون نعيم الرومي
يادم الشـهيد اليصرخ ايـنادي – كتـلوك ابـغدر بيديـن لعبادي
يادم الشـباب ابرگبتك..إســمع – تتناسه يقائد جيش .. لوناسي؟
شاطر بالحچي تخطب اوتتمسكن – تأمـر بالقتـل للفقـره واتعادي
مستقتل ع الحكم وي جمعة السراق – انت والربع .. كل واحد ابوادي
(الحارث) كتلتـه ليش ؟ شمسـوي ! – (حارث) منتفض ابحقه وايداعي
*و(اخمسطعش) من الشعب صفيت – بارصاص الغدر..چا ليش؟يعبادي
حـُرمـه مابـقـَـت للوطـَـن يا ظـِلاّم – واغراب الكوشت ع الوطن يالحادي
(البصره اوسماوه) (الشطره وي ذيقار) – معتـصمه اوتـريـد العـدل واتنادي
(كوت اوكربله) و(النجف وي بابل) – ثـارت والشـباب اتنادي يبلادي
اهـوايـه كـُـتل نفس النهج يمشـون – اسـنين امعـدده والفلم يـنعادي
احذر يا شـعب .. شــكلوْ حكومـَـتهم – حكومة قشمره من عرب واكرادي
صون ابثورتك لا تسكت اعله الضيم – ابـدمك يا شـهيد اتـحـَـنـَّه كل وادي
وسع ثورتك واگلبهه .. لا تسكت – اوجوه الخدعتك هالردت اتعادي
الثـوره تـِـريد اقياده مدروسـه – احذر مرتشي اواحفاد جلادي
فاليحيا الشباب الثائر المغوار – والتسـقط حكومة بوگ تنعادي
————————————————————————
* ( خمسطعش 15):- مجمموع الشهداء الذين قتلوا برصاص القوات الحكومية
في التظارات
——————————————————————————–
23/ آب / 2018
ســـــــــــــــــتوكهولم
تنويه: جميع المقالات المنشورة تمثل رأي كتابها فقط