ممنوع الكذب

فاكرين فيلم نص ساعه جواز اللى رشدى اباظه كان دكتور اسنان فيه و شاديه ممرضه فى العياده عنده

وكانت ماجده الخطيب بتدور على انسان ميكونش بيكدب نهائى و كان خاطبها رشدى اباظه اللى عمل المستحيل عشان يقنعها انه صادق و فى آخر الفيلم هتكتشف انه بيكدب عليها ف تعتقد ان عادل امام صادق فيقولها انه كمان بيكدب و انه كومبارس مش نجم فترفضه و تصمم انها لازم تلاقى واحد مش بيكدب و ينتهى الفيلم و هى ماشيه وحيده مش هتتجوز على امل انها تلاقى الانسان اللى مش بيكدب ابدا.

الفيلم دا بيعجبنى اوى بس كنت كل ما اشوفه اعتبر ان الكاتب مش لاقى لماجده موضوع او انه مأفور فى حكايه مبيكدبش

بس مع مرور الزمن لقيت ان فعلا اهم شىء فى اللى تعرفه سواء جواز او صداقه انه يكون مبيكدبش ، الكدب دا حتى لو كدبه بسيطه ممكن تدمر حياة انسان او مستقبله و متقولش كدبه بيضه و سودا ،متجوزش بنتك لواحد بيكدب حتى لو قعدت لك فى البيت و متصاحبش واحد بيكدب و متقولش مسيره هيتغير اللى فيه داء مبيبطلوش

، لانك فى الحياه هتلاقى ناس بتكدب عشان تكدب ، الكدب بومبونايه فى بقها يعنى مثلا انت منين من الاسكندريه و هو من القاهره طب ليه تفرق فى ايه اهو كدب و خلاص من خلال تجاربى عيشوا بدون جواز او بدون اصحاب لحد ما تلاقوا اللى مبيكدبش ( الصدق منجى من المهالك)

الحسين داود

تنويه: جميع المقالات المنشورة تمثل رأي كتابها فقط
Read our Privacy Policy by clicking here