يا عيني العدس

يا عيني العدس

*ابيات من شعر التجليبة

ميسون نعيم الرومي

اجلبنك يليلي والعدس عيديـّه

نص كيلو عدس ! نرگص ابچفـيـّه

إحنه ابخت كل سيد اوعلويـّه

حكومة بيع ذمـَّه اشلون تطبيبه

اجلبنك يليلي ألف تجليبه

***

اجلبنك يليلي والعدس يا عيني

يـِطـَوّل بالعمر وايزيد بسنيني

ادعي عليكم بالنجف وابديني

چيله الإجتكم بالگلب واتصيبه

اجلبنك يليلي ألف تجليبه

***

اجلبنك يليلي والعدس تغيير

نص كيلوعدس للكهربه تنوير

تبليط الشوارع وياهن التشجير

أمراض امعشعشه تنتهي ابتطبيبه

اجلبنك يليلي ألف تجليبه

***

اجلبنك يليلي والعدس يلمع

ناكل بالعدس واعيونه التدمع

أيتام الشوارع يا (عادل) انتَ اسمع:-

اذبحتوا المعيل ارجال وي شيبه

اجلبنك يليلي ألف تجليبه

***

اجلبنك يليلي والعدس منحه

نص كيلو عدس!يا عينك الوكحه

انجازك صفر ماضن أبد تصحه

تـِـرَجينه الفرح يا خيبة الخيبه

اجلبنك يليلي ألف تجليبه

***

اجلبنك يليلي والعدس درَّه

يا سِر العدس واشلون چا سِرَّه

يقضي عَ الفساد اويعمل الثوره

للجانـَه لـِفوْ ايگصص مخاليبه

اجلبنك يليلي ألف تجليبه

***

اجلبنك يليلي تحكمنه كومه اشرار

نص كيلو عدس؟ والهم 1000 مليار

وابدمنه يول هالفاضت الأنهار

دگـَّـة كربله كل وكت واتصيبه

اجلبنك يليلي ألف تجليبه

***

اجلبنك يليلي والوكت أغبر

اصبـّر بالقلم والقلم ما يصبر

*جانه العدس واتفرهد العنبر

منـَّـه شورِبـَـه او هم منـَّـه تشريبه

اجلبنك يليلي ألف تجليبه

————————————

*اعلنت وزارة التجارة العراقية، بعد موافقة مجلس الوزراء، عزمها

منح نصف كيلو غرام من مادة العدس، لكل مواطن خلال شهر رمضان

—–

شعر التجليبة:- هو بحر من بحور شعر (الهزج)

سبب تسميته بهذا الاسم هو ان بيتا فيه قيل ..

كان يحتوي على كلمة (تجليبه)-

——————————————–

20 / شباط / 2019

ســــــــــــــتوكهولم

Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close