قصيدتي بعنوان : سؤال يحتاج الى جواب
__________________
عباس طريم
__
ليش عد الكفر , ممنوع الفساد
وليش عدنه البوك والفرهود
زاد ؟
+
واقتصاد الدول , يركض للامام
ليش عالبك عدنه يمشي
الاقتصاد ؟
+
وليش ساد الامن والعيش الكريم
بالدول , واحنه الفقر والجوع
ساد ؟
+
وليش كل الدول تفخر بالتراث
واحنه بابخس شمن بعناه
بالمزاد ؟
+
وليش كل لص , وحرامي ايحاسبوه
واحنه يطلع يفتخر بين
العباد ؟
+
كل شعوب العالم اتعيش ابسرور
ليش بس احنه , حداد ن
في حداد ؟
+
الخير ايظل بالوطن , يبني الحياة
ليش خيرنه يهج امن
البلاد ؟
+
الناس في كل معظله , اتحكم العقول
ليش بس عدنه الاصابع
عالزناد ؟
+
وليش ميهيد الوضع , بارض العراق
وحته بالشيشان والصومال
هاد ؟
+
وليش اليأمنوه , حارس عالبناء
يفلش الحيطان , ويبوك
المواد
+
وليش اصحاب البخل , صارو الروس
وذيلهم , صار المعدل
والجواد ؟
+
والشيوخ , البالشدايد ينتخون
والمضايف عامره ومليانه
زاد ؟
+
ليش هسه اتغيرو , واللي تجيه
يريد يعرف اولا
كم يستفاد ؟
+
وليش كلمن يسأل : شلونه العراق ؟
يجاوبه محيسن [ ولك اصبح
رماد ] ؟
+
وليش ابو البطيخ , يتعين مدير
وعادل الخريج , محصوله
السماد ؟
+
بالنزاهه وبالشرف , تفخر الناس
ليش عدنه الناس تفخر
بالفساد
+
وليش فاد النصح , وي كل الشعوب
ولا نصح بينه ولا ارشاد
فاد
+
وليش ابو الركي , يعينونه مدير
جاوبيني , فدوه لعيونج
سعاد ؟
+
وليش اليكول الوضع , مزري واليم
يهاجمونه اهل البخت
مثل الجراد ؟
+
وليش كلمن ينتقد وضع العراق
شارب ايكولون , ومضيع
الرشاد
+
عباس طريم