سته وثمانين فرحة

( سته وثمانين فرحة )
تهنئة لكل الصديقات والأصدقاء، الرفيقات والرفاق وللحزب الشيوعي العراقي لمناسبة ذكرى عيد تأسيسه الميمون …
ستة وثمانين فرحه.. .
ستة وثمانين نخلة…
ستة وثمانين عيد…
ستة وثمانين برحية شمع
الزمن شيّب اگبالك
وأنت زاهي ..
بثوبگ الأحمر يرفرف
حيل شاب…
وعزم يوميه جديد
إيدك اليمنه فرات..
اليسره دجله..
جفوفگ بشط العرب
تغرف الماي الزلال
يروّي للعطشان چودگ
گطره گطره…
گطره گطره…
يفيض طيبگ
من حقول الحنه تبدي
( الفاو)…
ل(السيبه) وبساتين العَنب
زقزقة عصفور عشگ
وبلبُلگ يصدح طرب
(بنگرة السلمان) ذكرى
ونفق…
نفق للثاير بنيت
قلعة (الحلة) وسجنها
فتّحت بالظلمه نور
وبقطار الموت يمشي
يمشي يمشي..
حبه حبه…
السچه تزرعها ورد
خضّرت بستان روحگ
ياسمين وحنطة سمرة
من (السماوة) ل(رقم واحد) للسجن
گل خناچرهم ، مشانقهم سراب
الدم شيوعي..
رسم باللوحه ( فهد )
الدم شيوعي…
شمَّس الدنيه ( سلام )
وذاب تمثال الثلج
وضحكت الدنيه ربيع
واحد ثلاثين آذارك شقائق
والعتب…
ما ظل عتب
ساحة التحرير ثورة
ساحة التحرير وردة
وردة حمرة…
زوگت شفة عرايس للحزب
بساحة الحرية وبگل الوطن
صوت واحد..
ينهدم عرش الظلام
صوت واحد…
من الظلم يشرق عراق
بيوت يبنيها الفقير..
مدرسة ومرجوحة وحديقة
والحلم…
گلش چبير…
والحلم امنوَّر عراقي …
ليلو وگلايد سنابل
وترجع الفرحه هلاهل
والوطن…
حر النشيد
والشعب…
يفرح سعيد
يا حبيبي الدنيه ضاگت
وخلگگ الواسع ضمير
خلگگ..
الواسع..
ض.. م.. ي.. ر
……
حامد كعيد الجبوري
آذار 2020

تنويه: جميع المقالات المنشورة تمثل رأي كتابها فقط
Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close