قصيدة عالم كورونا

قصيدة عالم كورونا

د حسن كاظم محمد

يا عزيزي لا تضوج ولا يصيبنّك ملل هاي حاله بهذلتنه وورّطت كل الدولْ

هاي دنيه بيهه غيمه وبيهه صحوه

بيهه كمره والشمس يتبعهه ظِلْ

بيهه خير وبيهه شر بيهه الظلم

بيهه رحمة والبشر من كل شكل

هذا كل اللي حجيته مو عجيب

وجان معروف وحقيقي من قَبِلْ

آه من كورونا راوتني العجب

وتيّهِتْ لحساب وضيّعت السِجل

ما شفت من مرته واحدهم يخاف

ويعتبر بوستهه حنضَلْ موعسل

ما شفت واحد يخاف من البريد

يفتحه وجّم مرّه إيده تنغسل

ما شفت فد يوم تتغطى الحلوك

كورونا غطّاهه جبار البطل

ما شفت حاكم يخاف من الحرس

يبتعد عنهم ولازم ينعزل

ما شفت مغرور متحِمله الأرض

يِختل ابّيته وشبّاجه انقفل

ما شفت تاجر يصيح ويستغيث

بيع ماكو لا شراء ولا عمل

ما شفت واحد يفكّر بالفقير

وكلهه تحجي بالحقوق وبالعدل

ما شفت سجّان خاف من السجين

يحاول يدبّر طريقه بيهه حل

ما شفت دفّان يسأل عن سبب

موت كورونا لو موتة أجل ؟

ما شفت ظالم ومظلومه اتفق بالعلاج وبالدوه للكل شِمل

ما شفت قادة دول تحجي الهزل

وتصرّح بأقوال مملوءه دجل

ما شفت تصريح كول بلا فعل

ينطي حلْ مضحك وما عنده خجل

ما شفت يوم الغلط يصبح صحيح

وما شفت أعوج يسمّونه عدِل

ما شفت واحد من العطسة جِفل

وحار، دايخ ما عرف وين الخلل

الناس صاحت يا إلهي بالأخير

تريد ربك ينتشلهه من الوحل

آنه أتمنى البشر ياخذ عِبر

ويتّبع ما كاله ربك والرسل

هذا عالم زين شفناه بوضوح

دَرِس منّه ياخذه صاحب عقل

أصبر وقاوم حبيبي ولا تِمِل

سلّم أمرك يم إلهك واتّكِل

تنويه: جميع المقالات المنشورة تمثل رأي كتابها فقط
Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close