قصيدة: كورونا / العالم الآخر

قصيدة: كورونا / العالم الآخر
د حسن كاظم محمد
دِنْيِتـك لحظـات داخـت بالخـبرْ
جانه كورونـا وبعد وين المفر
حاروا الحـكّام بيـهه بكل مكان
وقرروا فرض التباعد والحظِر
وصرّحوا شهرين هيَّ وتنكضي
وبعد كالوا ضِيف إلهه اجّم شهر
هذا كــول اللي صِـبَح ما بي فِعِـل
مثل شـاطي النهـر بي مدّ وجَـزِر
هاي مو لِعبة دول بين الشعوب
هاي من الله امتحان إعله البشر
هذا عالم شفت بي كلّ العجب
خلِّ اسـولفـلك إسـمع وافتـِكـر
شِفت طيّارات حَطّت عـلْ أرِض
والسِمه أصبح مُلك بس للصِكَـر
صار مدّة ما يِرن صوت القطار
بالمحطّـة مِن يجـي يمـنه ويـمر
بـَس بقه ديـج الهراتي مســتمـر
بعِلو صوته يعوعي في وكت الفجر
شفت مصنع من قُفَل بابه وكِعد
والنحل بين الورد شُــغله كِثـر
شفت مركب آنه عل ساحل رِسه
والسِـمَج مرتاح سـايح بالبـحر
لسّه أسـمع بِلبل يغنّي بفرح
والبشر ملتهبـه ناره وتِستِعر
عالم الحـيوان عايش في أمان
وعالم الإنسان عايش في حذر
شفت شارع ما تمر بي مركبات
بس شفت راعي رِعاهه للبـقر
سمعت إنت لاس فيكاس عَطِّلت
بس بُقه كورونا يعزف عالوتر
بحـرب إحـنه والقـيادة للـعلـم
والطبيب الخفَر بيهه في خطَر
هسّه كل واحد يكول آني البطل
ودبّرتهه وعندي أحسن مختـبر
ما أصـدّك بعـد من عِـدكـم جـدل
حتى اشـوف بعيني منكم ما بِدَر
إعْرفت هسّه يا عزيزي بالخبر؟
ســلِّم أمـرك يَم إلاهٍ مُـقـتـدِر

Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close