كلما يهل الگمر

كلما يهل الگمر
ميسون نعيم الرومي

كلما يهل الگمر
اتمعنن ابنوره او احن
نجمات چن زفة عرس
والليل كحله للرمش
السمه شذرات اوضوت
عالرگبه گردانه
النخل يتمايل غنج
غنوة فرح بسمانه
والنسمه وي طرت الفجر
غنت فرح نهرانه
يادجله يالمايك عذب
حلم اوأمل عنوانه
***
الموج عالي يابحر
والروج يتهاده اويرد
نوبه ابفرح نوبه ابغضب
الريح تلعب لعب
ما تنحزرلا تنعرف
مركبنه ضاعت وجهته
قبطانه تاهت عرفته
متعوب يا ليل السفر
والعمر راح اتعده
الصبر گاعه مولحت
ماضن يخضر ورده
أحاه يا ديرة هلي
خيرچ الغيرچ عده
***
حرگوا الحنطه والشلب
فلاح دمعه ابچفه
عامل يحومي ع البعد
تحفر العبره ابخده
چم دوب نبچي اوننتحب
والحسره تچوي بالگلب
يا لليل عـَـشعـَـش بالبلد
ناشر عباته اوحزنه
واشعلنه شمعه للشمس
يوم او تمر تذكرنه
اتعبنه يادنيه بعد
من محنه نغزل محنه
***
الوطن باگوه الوطن
لتگول يمته اوتحن
اسكت اومامش رجه
مات الحلم بسك تون
كافي يروحي بعد
طالت اسنين البعد
والعين تربي اوترد
تترجه يوم امن الصبخ..
يزهر او ينبت ورده
سيس بلمنه ابلا هدف
والدهر يلعب بينه
لاچنه رحنه اوجينه
لاچنه رحنه اوجينه
———————————–
2 / حزيران / 2020
ســـــــــــــتوكهولم

تنويه: جميع المقالات المنشورة تمثل رأي كتابها فقط
Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close