( امـــــــســـامـــــحـيـــــنْ..)
…
امسامحين..
ياهو گال امسامحين
ونغفر ذنوب العَليْكُم
صَحْ كُبرنَه وصحْ نِسينَه
بَس بُقَن طَبْعات إديكم
مسامحين
اِتْعَثّرتْ بشفافي چِلْمَه..
وطَشَريَتْ احروفها
خاف گلْبي يگلّي لِمْها
وِبْحَنينك روْفها
فوتي روحي بزود
والدنيه امتحانْ
الخاسر اول دور
لا يدخل رِهان
دروس أخَذْنَه
وعَلَمِت روحي
إعلَه وَنْهه
كُبرت الاهات بيها
وآخ ياحسرة.. حِزِنها
سامَحِت …لا ما اكولن
چلمة التِنْگال اَبَد ماگولها
لِسّه يوجعني حَچيكم
٠٠٠٠٠
مسامحين
تهيْد بَلْچَي وتِستِچن
إجروحي مِن يبطل نَزِفْها
اكليل ألبِّسْهَا وعَليكم
بيدي يَل مَيْتين أَزِفْها.
اكبار صارن …..
بيّه ويثيرن مواجع
كل جرح بيهن قصيده
شَكْتِب وشَمْسح شَراجِع ؟
بَــــسْ يگلبي …. بَعَد
لتسامِح لئيم
عاش وِتْربّه اعله جرحي
ومِنْ شِبع گللهم غشيم
بويه مِنْ إيْجر ضحكته
ويه الشِّماته اشطولها
ما اسامِحْكم وَعوْدَن
چِلمَةْ التِنگال اَبَدْ ماگولها
لسه يوجعني حچيكم
عبدالكريم صالح العامري
امريكا. سياتل