قصيدة : كورونا / العالم المتكبر

قصيدة : كورونا / العالم المتكبر
د. حسن كاظم محمد
يا عزيزي اعرفت شنهو اللي جِره
العـالم بلـحظـه فِـگدهـه السيطـره
العـالم تكبّر ، تِـعـدّه وانتهـك
وگال آني وماكو غيري بهالورى
گال آني المال عنـدي بلا جـدل
وكلشي من عندي يُباع ويِنشره
گال آني صعدت عِد سطح الگمر
أگدر العـب لـعـبتي فوگ الكُره
* * *
على البيئه تجاوزينه بلا سبب
بكل صلافه لا أسف لا معذره
هذا كلّه من الغرور من البشر
يِنسه نفسه ويعمل بكل هستره
ما شفت مغرور يتعلم درس
ويبدّل أسلوبه وياخذ مشوَره
عِلـّة الظـلّام ما تاخـذ درس
لأن ما عِدها البصيره المُبصره
* * *
ما دريت الدنيه ديلاب الهوه
مرّه صاعـد مرّه نازل للـثره
إقره تاريخ الأمـم وافهـم تمام
وين صارت دول چانت عامِره
* * *
هاذي أحلام الطُغاة بكل زمان
تُبقه تتمنّه لحـدّ المگبـره
ياعزيزي اصبر وطوّل لك خلگ
تـِنـفتـح آفـاق إلـك مِتـنـوّره
أِّبشر وبشّر وليفك بِالأمل
بالأمل تِزداد عِنده المَقدِره
* * *
بالنهايه لازم الكُل تِعتِرف
هذا عالم بِيه دِنيه وآخره
وبعد ما زاد الظُلم والإنتِهاك
آمَـنو بِالـّلـه قُـدره قاهِـره
وإلى اللقاء

تنويه: جميع المقالات المنشورة تمثل رأي كتابها فقط
Read our Privacy Policy by clicking here