الصديق الشيطان

الصديق الشيطان
عباس طريم
________

الصديج ,الي يطعنك بالظهر كل يوم
.. ومن تجبل عليه ايبوسك
ابخدك

ويشوه سمعتك , هيجي دون اسباب ..
وشايل دوم رايات الحرب
ضدك

وباء اوشر اذا كضك , تعلك بيك ..
ومن الصعب مهما اتحاول ,
ايهدك

هذه العدو ابعينه , لا تظن فد يوم ..
من تنخاه ايكلك , صاحبي
عدك

وده اتصير ناصي وبالحفر يلكاك ..
وانته , ايصير اعله من النجم
ودك

المشاكل يشتريهه وهيه جوه الكاع ..
ومن تحمه الحديده يلبد
ابسدك

موصاحب , عدو , لو شاف عدك ضيج ..
يتعذر ويمشي ويتركك
وحدك

دوني , وهوه يعرف من تقاس الناس ..
ابميزان الخلق والشرف
مو ندك

ياحيف الزباله اتحارش العنوان ..
وندريهه ابد ما توصل
الحدك

الشرف موعنده , ياما خان بالخوان ..
والغيره الرجوله , والشرف
عندك

ما معروف جزره , ومده ما معروف ..
وانته البحر , واضح جزرك
اومدك

يخلط بالهزل جده , ويجرحك بيه ..
وانته الطيب كله , ابهزلك
اوجدك

كريم انته ونبيل , وهوه كاعه البور ..
بخيل , ولو تعنيته ابطلب
ردك

انته الخير, متقدم عله الشر دوم ..
من هالمنطلق , هوه اليجي
بعدك

اتضحيله ابحياتك , ما تفيد اوياه ..
وهوه ايظل هذاك , اليشتغل
ضدك

ولك يالخالي , لا من مستحه ولا ذوق..
بالسوري ارد اكلك
[ولك شو بدك ]

Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close