الى البصرة

ميسون نعيم الرومي

يالبصره يم الخير صرتي مـُـشاعه
وانتي العـَصيـّه دوم محد غـِزاهـه
-(جنة عدن) وصفوچ درة زمانچ
*(آدم) أبونه ليچ ارضچ وطاهـه
***
*علم اوثقافه اونور تشـهد ولدهـه
*موصوفه بالتاريخ (عمر) البناهه
مثل الذهب بالگاع نخلچ غلاتـَه
*گال اووصف(هارون) كلچ نفاهه
***
*دجله اوفرات الحب تحضن بعضهه
كل الشـعر مگيول يـوصف حلاهـَه
يا (بصره) يالفيحاء يا موطن العـِز
نفطچ صفه للجار واهلچ جواعه
***
بعد الألوف اسنين وين انتي صرتي؟
سقط المتاع انجاس ارضچ غزاهه
شعبچ صفه منهوب وارضچ خرابه
اهلچ تـون اتنوح فجـروا دماهـَه
***
هبّ الشباب اليوم ما يرضه ذلـَّه
ولد اوبنات ابطال اتحرر سماهه
شدوّا حزمهم حيل ماهمهم الموت
گاعچ عزيـزه دوم دمهم سـِـگاهه
***
هدوا ابكاتم صوت رادوا يسـكتوچ
خـِـنـَّـث تهد بالليل..(للجاره) ولاهه
شهداء العراق امجاد هالتطلب انصاف
شـبان العـراق اســباع لبـّـت نـِداهه
***
-(تحسين اوريهام) واوياهم اهواي
دمهم جره بالگاع للبصره چواهه
بغداد الجريحه دوم تنزف حزينه
-(ثنوه وابنهه) اهناك محد نساهـَـه
***
شبان اهل (ذيقار) يا موطن العز
هبت اوكلهه اليوم ..فدوه اشحلاهه
مرفوضه هالأحزاب من قبل اهلچ
-(تجرفهه) لن اتريد تغسل ثـَـراهه
***
انجاس الوِطـَوا بغداد وارض النبايه
ولد العراق اسـباع تعرف غـَـلاهه
سبعطش من السنين اليوم سووهه حرثه
يتقاســمون الخير شــوف التفاهه
***
بعت العراق ارخيص اسمع يخايب
تحكم تريد اردود؟ شوف السفاهه!!
يتمنطق اويحچي اكبار والكل تعرفه
شگف (القنادر) شوف چنه نساهه
***
باچر يصير احساب..تاريخ اسألوه
لا ينفع ندم لا افلوس ماكو وجاهه
اهل العراق ابطال ياولد (ســومـَـر)-
ايـديكم ايـد ابإيـد.. محـَّـد لِواهـَه
——————————————————
*يعود تاريخ مدينة البصرة إلى ماقبل العصور التاريخية حيث يعتقد الكثير من الباحثين على أن جنات عدن التي نزل فيها آدم أبو البشر تقع إلى الشمال من مركز المدينة بالتحديد منطقة القرنة(ويكيبيديا)
—————————————————————–
*عُرفت البصرة أيضاً بدورها الكبير الذي أدته في تاريخ الثقافة العربية الإسلامية. فقد كانت مساجدها ومدارسها تعج بحركة العلماء والفقهاء والأدباء. وخرج منها فطاحل علماء المسلمين وكبار فقهائهم.
——————————————————————————————————-
*لبصرة مدينة قديمة شيدها عتبة بن غزوان في عهد الخليفة عمر بن الخطاب(ويكيبيديا)
——————————————————————————————————————
*قال هارون الرشيد كل الذهب والفضة على وجه الأرض لا يبلغ ثمن نخلة من نخيل البصرة
—————————————————————————————————————
* يلتقي نهري دجلة والفرات، في منطقة (كرمة علي) المدخل الشمالي لمدينة البصرة فيتكون نهر شط العرب
———————————————————————————————————————-
27 / آب / 2020
ســـــــــــــــــــتوكهولم

تنويه: جميع المقالات المنشورة تمثل رأي كتابها فقط
Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close