تشــــــــــرين..يا تشــــــــرين

تشــــــــــرين..يا تشــــــــرين
ميسون نعيم الرومي

تشرين معناها الشباب المنتفض
تشرين..يالعزه اوكرامه اويا فخر
تشرين..هذا العراق اللّي كـُبـَر
تشرين..يا ثوره اوأمل
تشرين..معناه الأرض..
تشرين..العفـَّه يعني والعرض
تشرين تسري اويه النبض
تشرين..معناه العراق المنتفض
***
تشرين..يا شمس اوضوه اوبي گمرَه
تشرين..يا فـِكراوعقيده اوعـِبـْـرَه
تشرين..مستقـبل شبيبه اوحرَّه
تشرين..كل نخل العراق..اويه النجم يتعـَـلـَّه
تشرين..يا كحلة رمش..او بيها الجفن يتحـَـلـَّه
تشرين معناه العراق المنتصر
يعني الگصيبة والشرف..
للشگره الحسِـن والسمره
***
تشرين..يا دم الشباب الوَرَّد اوبي أزهـَـر
تشرين..شيله امبـَخـّره ،عطرَه السعد والمحلب
تشرين.. يا رمز اوعقيده ! والفخر للثوره
تشرين..شريان ووريد الكل گلب يتعذَّب
تشرين..مهره امضمرّه..اوهيبة فرس للملعب
تشرين..يا حنة عرس بچفوف ابد ما تتعب
تشرين..ياغـِترَه اوسداره اوبغدَدَه..يعگال هيبه امگصب
تشرين..بس لِبـْن العراق اتلوگ إله اوتتحبب
***
تشرين..ابكل شارع او كل بيت بي تتجدد
تشرين.. يا طعم المجد..تاريخ دومه ايخـّـلـِد
تشرين..يا دجله اوفرات الماي بي يتعـَمـّـد
تشرين..يا نهضه اوعلم..ما تركع اولا تگعد
تشرين..تطرد كل دخيل او ظالم او كل مجرم..
هذا الذي ابدم الشعب يتوضه..ايصلي چذب يتعبد
تشرين..شعله للزمن اتفوراوأبد ما تبرد
تشرين..إنشودة وطن بي ننشد
تشرين..من حقهه الزلم تفتخر بي تتخلد
تشــــــــــرين..يا تشــــــــرين
—————————————
1 / نوفمبر/ 2020
ســــــــــــــــــــتوكهولم

تنويه: جميع المقالات المنشورة تمثل رأي كتابها فقط
Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close