( چَمّليتك روح.. )
…
چَمّلِني فرح
مو چَمّلِيتك روح
تردهه تگّلي مو تازه.
وتگّلي..
بايته من سنين
سَلّة تين أَنَه ببابك..
بَيّيتتهه
و ناطر ايعازه.
إخِذهَه وروح
جَنّه وفوت قَبْلك
ما ظُفّر بيهه
ولا مُحِب فازَ
تقاسمتها وياك
نِفَس …. بعد النِفَس
مامش بعد عازه.
يخايب
ظَلّْ لي نص تعبان
الك صاحي …
واِلي الخربان
شمالك ؟ هيچ المجازه.؟.
توازيني..
على الهجران..
واصْبِر ..رغم الموازهْ.؟
بِنِيتَكْ..
وانتَ جرح ايغور
ظلمه وتاكل بهالنور
عِگَدتْ ولَنّْك إگزازه.
تِشَگِگ..
بِالقَبِل مَرْيوف
چاهلبت ضميرك
خَيّطه ورازه.
مو عتبه الشِّفِتهه
ورَزّه بِالدَلّال
هاي إنْدوب
طعْنَك واضح احزازه.
يشايل مني موْگَدْ غَيض
وانه الفيض
گلبي وگلبك إمْفازه.
اعاتب والدمع مَكْتوب
يسولِف قصّة المنكوب
عمري وآخر إنْجازه
حَدّبني الوجع
صارت سماي الگاع
واگِلْهُم مو وِجَعْ
مِن ثِگْلِ لالمازه
طيح
بعيني … گِتْلي اتطيح
وطِحِت
وتْسومني جنازه.
غُربه التَمّت وشِمّات
عَدِل ؟
لا
مو عَدِل !
لا مات
مات الكِتْلِته اعزازه
أَنِشْدَك
مِن فِتولَك هاي
كَتْلي ياشرع جازه
موتي ياشَرِع جازه
..
عبدالكريم صالح العامري
امريكا . واشنطن سياتل