حسبالي تحزن لوغـِبت

حسبالي تحزن لوغـِبت
ميسون نعيم الرومي

حسبالي تحزن دوم لوغبت عنك
متباهي وابدنياك ناسـيني چـَـنـّـك
**
ناسـيني چنك ليش ناكر العـِشـرَه
والخوره والعشار تشهد البصره
***
والبصره أمّ الخيـر چـِنـَّـه ابسـعاده
إتطشر شملنه اوضاع يهل (العباده)
***
والغـربه يالمحـبوب وجـِّـرَت بـيـنـه
روحي اشتهـَـت(بغداد)عـَنـّـت علينه

***
عـَـنـَّـت عـلينه ايام والگـلب هالحـَـن
للوطن هزنـَـه الشوگ والشَـكوه إلمن ؟
***
إلمن دَگـلي اشــلون نشـكي ألمْنـَه
راحت واجت لسنين واحنه ابقهرنه
***
اسنين او تمر اسنين تسحن عمرنه
أيّـسـْـنـَـه يا (بغداد) هـذا وعـدنـَه
***
والوعد جمرة نار تحرگـنـَه بسـكوت
بالوعد تخلف دوم سكته اوبلا صوت
***
سكته اويهل ادموع وادموعه ع الخد
هذا (العراقي) اينوح بهمومه وايـعـِد
***
اهمومه ثگيله اهواي كثرت اجروحه
جوع او مرض واحروب حايرابروحه
***
روحه الأبـيه ليـش ذلـَّـتهه حـكام
دَمـَّـه ظلم رخصوه! والظلم ما دام
***
دام واتِجـذّر آخ .. هالمرَّت اعـقــود
من بـَدوَت (الثورات) نحصد بالوْعود
***
اوعود او قهر ويّ موت والنفط عدْنـَه
نسـمع ابأسمه او بـس ! بلوتـنـَه منـَّـه
***
مـِنـَّه شـبـَـعـْـنه الضيم خـيرَه للاجناب
امصيبه اوغزتنه النوب حفنه امن الاذناب
***
أذناب او تجر اذناب طرگاعه جـَتـْـنـَه
خـَـلـّـونـَه ع الرنگات نســبح ابـدمنه
***
دَمنه رخيص! اشلون وامـْنـَه الوفيـّه
اتربـّي او تزف للموت شن هالبليه
***
بـلوه ابتـلينه احـّاه يا دنـيه كافي
حتى النفس مگطوع والفگرلافي
***
واختم ابياتي هاي ابهاذي المصايب
عـِدْنـَه بلاوي اهواي عدنه العجايب
عـِدْنـَه هموم اهواي كومة مصايب
———————————————-
4 / ديسمبر/ 2020
ســــــــــــــــــــــــتوكهولم

تنويه: جميع المقالات المنشورة تمثل رأي كتابها فقط
Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close