احنه المگاريـد

احنه المگاريـد
ميسون نعيم الرومي
احنه المگاريد
إحنه غـَرَّبنـَه الوكت
ما النه أبد هاليوم أحد
إحنه المگاريد
لا جمعه عدنه..اولا سبت..
ما عدنه أحـَّـد
بينه الدمع يتمرجح اعله الخد..
والعين تربي والمزار ابعيد
احنه ما أبد أحد تـِنانـَـه .. والدرب صارابعيد
احنه المگاريد
***
إحنه المساكين ..
دمعتنه ابكل وكت بالعين
إحنه الذي ماعدنه تدبير
(إسمنه بالحصاد اومنجلنه مكسور)
او(كـِلـَـت حنطتـْـنـَه الشعـيـر)
والگاع صارت بور
تعلمنه الصبر نحمل مذله او جور
نترس بالحزن ليوين يا ناعور؟
سَـكــَّـتـْـنـَه الظلم للعتب عيب انعيد
إحنه المگاريد
***
إحنه الخطيه الما بعد كلشي انريد
خـِطـيـّه إحنه (الصِفـَگـْنـَه الگاع بالإيد)
كلشي ما قبضنه .. اوما بعد كلشي ايفيد
نحبس بالونين .. او عيد مامش عيد
هانت من نگول .. أزود زود اتزيد
إحنه الخطيه الما بعد كلشي انريد
نسكت .. مانحچي بعد وانعيد
إحنه المگاريد
***
منسيين اونسونه اواحنه منسيين
راگ الراگ نمشي .. ابسـِـد حياطين
انبگـْـنـَه غفل ! علتنه لن طيبين!
احنه اللي تعبنه احنه المظاليم
طـَـلـَّعنه إدينه امن الروازين
صرنه احنه خطيه اوهم عناوين
احنه الذي سمونه المساكين
إحنه اللي تـِـزامنـَّه اويـَه (كوفيد)*
اوعشرتنه اصبحت ويـّه العرابـيـد
احنه المساكين..احنه الخطيه..احنه المگاريد
إحنه المگاريد
————————————————–
*(كوفيد):-كوفيد 19 فايروس الوباءالذي فتك بالبشربداية سنة2020 
ديسمبر/2020
ســـــــــــــــــــتوكهولم
تنويه: جميع المقالات المنشورة تمثل رأي كتابها فقط
Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close