ابرة الكورونه

ابرة الكورونه
ميسون نعيم الرومي

كورونه اللِفتنـَه *(العام) سوتنه طشار
كلمن كرصْلـَه ابدار يسمع بالاخبار

يسمع خبر كل يوم يتراجف ايگوم
مايدري وين ايريد يگضيهه بالنوم

ابنومه يحلم بيه طالعله (كوفيد)-
وامشندخ الذرعان كل طـِبـَّـه متفيد

طرگاعه اجت كوفيد وامنين اجانه
هد اوهجم بسـكوت بـَـلوه اوبلانـَـه

تـَعـَّـبـنه (هالكوفيد) ثانـيـله ركبـَه
امحزم علينه احزام (هـَـزلنـَه) رگبه

امحزم ايموت الناس منهو اللي سوّاه
تهموهه گالو (صين) فيروسه ودّاه

بلوه ابتلينه (الصين) تاكل (خفافيش)-
صرصر اودود الگاع والمچسي بالريش

هـَـب العـِـلـِم هاليـوم يـنـقـِـذ العالم
-(كادر الطبي) انريد كل وكته سالم

و(العالـِـم) ابهاليوم ثروه اوأملنه
كل الوكت سهران ينقذ (كـُـرَتـْـنـَه)*

اخترعوْ (الفاكسين) كل بلد بي نـوع
صار اللغط والگول والوادم اتلوع

واحد يگول اشلون..ما اضرب ابره!
والثاني بـيـه ايـلوم حايـر ابأمـْـرَه

واشتغلت الأقلام كتبت اشـاعـات
-(بتويتر اوفسبوك) علگوْ الرايات

كلمن ضميره ايگـول يتبـَرّع اخبار
صدگ اوچذب اقوال والبشرمحتار

حرنه يربي اشـلون هاذي مصيبه
موت اوخراب ابيوت كلمن نصيبه

قـَـرَّرِت آنـَه اليـوم اضرب الأبره
وادعي على *(الكوفيد) يحترگ أمره

يحيا (العلم) نبراس يضوي ابدربنه
و(العالـِـم) طليعه اليوم شـمعـه ابدربنه
————————————–
*(العام):-السنة الماضية
* كـُـرَتـْـنـَه:- اقصد الكرة الأرضية
*(الكوفيد):-كوفيد19 فايروس الكورونا
——————————————————
27/ ديسمبر/2020
ســـــــــــــــــــتوكهولم

تنويه: جميع المقالات المنشورة تمثل رأي كتابها فقط
Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close