أبوذيات متنوعة جديدة

أبوذيات متنوعة جديدة
د. حسن كاظم محمد
ما يكفي الحبيب اطّـيه شبگه
ولا شمّـة هَـوه وفّـيش شَبگه
كلشي لو كسب وليَّ شُبْـگه (بمعنى ماذا بقي)
موت اسْلم إلي جَـوّه الوطيّه
*****
أَمْـشِي بْدَرُبْ لا يَـمْـنَه وَيْسار
طَريـقِ الْعَدِل ماخِـذْني وَيْسار
وَگَضّي الْعُـمُر بالْفَـرحَه وَيْسار
إشْحَلاتِ الْدِنْيَه نِـگْضِيهه هَنِيّه
******
عُوفِ الْحِيرَه لَتْعَوِّل عَلَ الْفال
لَتْحِـير بْـنَهَـر وْيـصـيدَك الْـفال
تْـوَكَّـل عَـلَه أَلله فَـاتِـح الْـفـال (بمعنى التفاؤل)
رَبـَّكْ قُـدْرِتَه يْحِلْ كـل رِزيـّه
*****
نِـعْمَه لْـنَبِع طَعْمَه حِلـو يِنْهال
رِزْقـَكْ بـِالْسِمَه وَالْخـَيْر يَنْهال
رَبَّكْ يِحْـفَظَـكْ لَـوْ جِبَل يَـنْهال
لْنِعَمْ مَگْسُومَه لَـك هِـيّه خَفِيّه
*****
لَتـْگِـلّي الْـفَقـِير اْنهِـجَم داره
گِلّي مِن غِـصَب حَقّه وداره ؟
يِـجي يَومَ الْدَهَـرْ وَيْدور داره
يـَوگَع مِـن صِعَـد نَفْـسَه دِنـيّه
*****
مَيِّ الْعين خوفِي عْـليكْ يِنسال
شَگُـل للِـناس هاذهْ أَمُرْ يِنسال
أَموتَنْ وَحْتِيي وِالْـرُوح تِـنْسال (بمعنى تصاب بالسل)
وَظَـلْ شـامِـتي يِتْـفَـرّج عَـلـيّـه
وإلى اللقاء

تنويه: جميع المقالات المنشورة تمثل رأي كتابها فقط