أبوذيّات في الحكمة
د. حسن كاظم محمد
لو شِفِتْ مَغْرور واگِع في وَحَل
وْراد مِنّك مَشْوَره بْأَمْره وَحَـل
گِلّه دِنْيَه بيهه شَـدْ مَرّه وَحَـل؟
چنِـتْ إنْتَه بِلْخَـلگْ عَنتر وَخَيّه
*****
لَتجَرِّب شَخِص وِتْعيده مَرّات
شْــگَد حَچْيه حِـلـو دَگّـاته مُرّات
سِلاّيه بْگُـفـه وباِ لوَجِه مِـرآت
شِـجاك شْـوَرّطـك نَـفْـسَك دِنـيّـه
*****
وَحَگ سورة الْتين وْجزو عَمّه
أَزيدِ الْوَصِل وَيّه اْخواني عَـمّـه (أخت الأب)
وَحَقّـق وَنْتبه موش أَمُر أْعْمَه
بَشَر هَل وَكِتْ عِدهُم سوء نيّه
*****
رَبّـك يرْزِقَـك أنواع غِلّه
سامِح بِالسِعِر لتگِلي غَلّه
حْساب الآخره بِل إيد غُلّه (تشد يده عقابا)
نَـدَم ما فاد مِن بَعْدِ المِنيّه
*****
نَصِح للعِمَل شَر يحتاج شِدّه
دوه الفاگد عقل رِجّـه وشِـدّه
حلاة الورد عِـند البيع شَـدّه
گالو للضروره الشِدّه مَرعيّه
*****
گالـو لا تِـزيد الطين بِلّه
سَهِّـل أمُر وتْوَكَّـل عَلْى اْللّه
ربَّك مِقتَدِر يوضَعْلَه حَــلّـه
أنَه وِنْتَ نِحِل هاذي القضيّه
*****
أدگّ الباب ما ضنّـيت أراكم
إنـتو لّي تركـتـوني وراكم
ثاري الگلب حَس بيكم دراكم
أضل اسأل وگلبي دگّاته قويّه
وإلى اللقاء
Read our Privacy Policy by clicking here