أبوذيّات ذات مغزى
د. حسن كاظم محمد
سِحَگـنه الْدهر چَـم مرّه لِوانه
بُگه بس الصـبـر يحفـظ لِوانه
حِلـفـتِ بْـشرف لو إنـتَ لوآنه
أموت من القهر وَتْرك وصيّه
*****
گِـلت وصْـف لمُحِـب ينراد صَفْـنه
شگـولن عـنّه بعْـد أكثر وَصُفْـنه
درسنه ولتگـينه بْـنَـفِـس صَـفْـنه
تِـمـنّـيـته يـصـيـر الـمُـحِـب لِـيّـه
*****
نِكَر فَضْلي وَكْتِ الْضیگ صَحْبي
صَـدْ عَـنّي وَحاوِل آنـه صِحْـبي
طلع چذاب ما مِن گول صَحْ بي
صَـديق الحُـر فَلا ينكُـر خَـويّـه
*****
صار الكِـذب عِـند الناس عاده
حچي اليوم باچـر غـيره عـاده
صَديق لْيوم بس اْختِلف عاده (بمعنى أصبح عدوا)
دريت الكذب مِـن أرذل سِجـيّه
*****
الطيّـب يبقه مخـلص ذا إراده
من طبعه وفطرته الطيب راده
وبالصعبات إثـبـت بَله شْـراده
غـالي وْبالـنفـيس يضحّي لِـيّه
*****
فَـتره ما يـمُـر يِمكن جَـرإيـده
حِـزنت وْيَ النخـل بَـيّن جِـريده
قريت أخباره يوم بْـفَـد جَـريـده
هِجَـر رايد وطن بَس هاي هيّه
*****
ليش گلّي تْغـرّبت مُـدّه شَـريـد؟
گِـلت رايد هالوطن منّه شَـريد؟
ليلي آمِـن وِبنهاري عِـش أريد
وَشْكر الله يْدُورهه بَـلكَـن عَـليّه
وإلى اللقاء
تنويه: جميع المقالات المنشورة تمثل رأي كتابها فقط