الفِـتنة أشدّ من القتل

الفِـتنة أشدّ من القتل
د. حسن كاظم محمد
بَشَر مِتْساوي تَكوينَه وخِلقْـتَه
وِحْسابَه دقيق بْساعَةِ لْـمَحْشَر
هْـناكه يِستِلـم حُـصْـتَه بْيمينه
وْتِـمَنّاهه الْمنيّه تْأخِّـرَت أكْـثَر
كِـلمَـن غَـرّته الْـدنـيه وْتِـكَـبـَّر
التوبه خسرهه وْتَـيّه المَـعـبر
لْعِلم يِرفَع هَـلَه وْجِـيلِ لْيـتِبعَـه
الجَهَـل طـول الْزمَن هَدَّم وَدَمَّر
لا تِـئمَـن صديقك جَرِّبَه مَوقِف
شوفَه بالْسفَـر يِتـنَكَّـر لْمَعْـشَر؟
يبِـلفـك بالحَچي وِيْشـمُّـر بْـئيـدَه
مْرايَه بالوجه وِبظَهْـرَك لْخَنْجَـر
*****
إلواعِـظ بِالـكلام وِعِـلو صَوتَه
فارِغ مُحتَواه لا سَنَد لا مَصْدَر
مُهِم نِيَّات تِصفَه وِالْعَمل للخَير
أجْر لآخـره هوّه لأصِل جَـوْهَر
*****
حْجاره لْما تِعِـجْـبك ممكن تْدمّيك
أبَد لا تِستِهن وتْگـول آنه اْكْـبَـر
تِدري مِن طِـغَه نَمرود وِتْـكَـبّـر
بَعوضه كِتْلتَه مِن دِخْلت الْمَنْخَر
*****
طُغاةِ العَـصِر ما تاخِـذ تَجَارب
عَنِ لْماضِي، تِگلّك إحنَه اْشْطَر
صِحِت رايد وَطَن صَيحَه قَويه
لِعْراق عْراقْنه هَيهات يُقْهَر؟
أُحيي بِـيك دجْله وْطـيب ميَّه
وْفُـراتِ الـمَلحَمَه لِـلْحين تُـذْكَـر
لـو نويـتِ الْـمشي لازِم تِستِعـِد
حاوِل أِشَّارِك صَديقَـك بالسفَـر
شوف يِظهَر صاحِبَك گول وْفِعِل؟
لو يِعـوفَك مِن أكو مِحنَه وْخَطَر؟
*****
گالَـوِ الْـفِـتـنَه أَشَـدّ مْن الْـقَـتِل
بْـتِعـِد عَـنْهه وِستَفيد مْنِ لْعِـبَر
أكو ناس تْـذِب حَطَب فوگِ اْللهَب
عـوفهُم في غَـيّهـم يَـومِ الْصَقَـر
وإلى اللقاء

تنويه: جميع المقالات المنشورة تمثل رأي كتابها فقط
Read our Privacy Policy by clicking here