أبوذيات متنوعة

أبوذيات متنوعة
د. حسن كاظم محمد
ذِرَفْت الدَمع من عيناي وَشَّل
وَخيّط ببْـرَه جَرح گليبي وَشِل (شليلة الخيط)
مِن دَردي خِفِت يوَگّعني ونْشَـل
زَحِف أوصَل لْك بْلَيله ضِويّه
******
بِيبانِ لْتِجيبِ الْـعَصُـف رِدْهِن
طْيور الحُب لو هاجَرن رِدْهِن
عَذاب الْغُرب لوعاتَك مِرَدهِن
الوَطَن يُبْگه أحِن لَه وْيِحِن ليّه
******
صِعَدنه لِلسَطَح وِنْصَبنَه كُلّه
مِنِّ البَگ خِلَصنَه الـليل كُلّه
مـو كافي صَبُر رَبّـك شَگِلّه
تُطفَه الكَهْرَبه وِالـحَر بـِلـيّه
****** قُم قُم مَي وَرِد أَهـديك فضَّه
لا تطمع وتصبح نَفِس فَضّه (غليظ)
تدّلّـل عَليْ بس لا تِرُفْضَه
بَلّوره بْشَذر فـوگاَه هـديه
******
خَـلْ احچي عـدِل وِبْـدون ادانه
حلاة الحلـوه فـوگ لْصدر دانَه
تِـهْـت ودِخِـت يَـم اهـلـه ودَّانه
وسهرنه الليل عَـل گمره سويّه
******
ربّك خلق وَسعه عْيون مَلحه
يعجـبني الطعَـم مِن زاد مِلحه
كرّرت الـمـدح كـافي مَـلحّـه
چَـنهه الگمر مِن طَـلّت عليّه
******
رايد وطن وَلْهج بيك يا عْراگ
ما أقبل تعَـدّي وَمْشي عَـرّاگ
لاچـن آنـه بـالـفزعـات عرّاك
ولا أرضه من الشامت وصيّه
******
مارِدِت تيأس ولا ردتك تِرِك
ولّي ميفيدك گِلت عوفه تَرِك
هاي دنيه جارك الّي يحترِگ
ساعده يساعدك ربي بالقضيّه
*****
حلاة الچاي اشربه باْستكانَه
حلاة المحب يضحك باستكانه (هدوء)
أبد ما مش زعل مِن بستك آنه
إخـذها بْـكل بساطـه وهاي هيّه
*****
گِـتلك دوم گلبي إلـك والروح
وگتلك دوم اتبعك وين متروح
تالي هجرت عفت الگلب مجروح
ما ظن گلبي ينساك حتى المنيّه
وإلى اللقاء

تنويه: جميع المقالات المنشورة تمثل رأي كتابها فقط
Read our Privacy Policy by clicking here

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close