أنشودة “تحرير الأرض”
د. رمضان مهلهل سدخان
إجينالچ أسود بهاي الارتال
نحرّر كلّ شِبر ابزود الابطال
جيش وحشد كِلْنا
ما يِنْمَس وطنّا
هِمَّتْنا حديد اتزيح الاجبال
***
إجينالچ خِيول اتسابگ الريح
بحلگ الموت صيحة مرجلة انصيح
ما نِرضى بالاجناب
گاع الوطن مِحراب
چم احسين فوگ اربوعه يطيح
***
إجينالچ سواعد نِغسل العار
نِخلّي فلولهم بالوغى طِشّار
شجاعة ومرجلة وزود
ماتلزمنه الحدود
وصار افرارهم عاجل بالاخبار
***
إجينالچ فجر ايبدّد الليل
ما عاش اليِضِدنه وبينه ايعيل
اليوم اغتاضت الگاع
صارت على العدا سباع
اذا مو للوطن چا شِلْنه بالحيل
***
إجينالچ زِلم متحزّمه حزام
تِدوس على المنايا ورافعه الهام
كِلهه مثنْيه وتگول
صولة حيدرة نصول
شعب بابل جذوره شلون ينضام
[email protected]