أبوذيّات متنوعة
د. حسن كاظم محمد
سِياسي هَلْ وكت سَـيّسه بْگُفّه
عايش عَـل چذب چَم مَرّه اْكُفَّه
أگـدَر أقـرَه وَجْهَـه وَقْـرَه كَـفّه
صُبُح يِحْچي شِكِل غَـيّر مِسيّه
****
إلْجاهِل ماي راكِد في مَحَلّه
مَا دَبّر أمُر ويحِل شي مَحَلّه
حَلاةِ الزَرِع مِن يِنبَع مْحَلّه (فيه حلاوة)
ريحَه مِن بِعِـد وطيّب شَهيّه
****
لا تْـفرِّق بَينِ الْـموصِل وْحِـلَّه
لَتْگِلّي بَعَـد حَـبْـل الْوَطن حِلَّه
ثابِت يُبْگه طولِ الدَهَر ما حِلَّه
وَشِـدّه بْقـوّه لَـفَّـه حَـيْـدريّـه
****
وَحَگ أُمَّك وَبوك وْرَحْمَه جِدَّك
يُبْگه اْلفَخَر لَك عِزَّك وَجِـدَّك
تِستاَهِـل أفِجّ بْحور وَجْدَك (الوجدان)
عِرَفتَك بِالوَعَـد خالِصِ الْـنيّه
****
ذِكَـرْت أيـّام حِلْوَه إلهَـه حَـنَّيـت
شَعْري بْيوم عِرْسي حِنّه حَنَّيت
مِن طال الـزَمن مَجْبـور حَنَّيت (انحنى ظهري)
خِفِت عَظْمي وِهَن وِيخون بيَّه
****
لا تِقلق حَبيبي اْنطيني فَـكّه
مِفتاح الگلب يمّي سهـله فَكّه
يَومِ الْضیگ يِحتاجِ الْجرح فَكّه
نْعـيش نْمـوت نِتوالَـم سِـويّه
****
بَردِ الـفَـجِر قـارِص بِـيه چِـلَّه
تِطلَـع شَمس يُبگه الْدفـو جُلَّه
سُـبحان الـخِـلَـق آدم وَجَـلّـه
وْتِرَك آياتِ لَه بْـكُـل البَريّـه
****
إليِتوكّل عَـلَ ألله دَوم ما حار
وَغُط الْبَحَر وَكسِب إلَك مَحَّار
جَيتَك خَبَر عاجِل عَمَل بَحَّار
گلادة ليلـو أعَلّگهه بـِدَيّـه
وإلى اللقاء
Read our Privacy Policy by clicking here