قصيدة / دُخّانَك خِنَگني

قصيدة / دُخّانَك خِنَگني
د. حسن كاظم محمد
دخّانَـك خِـنگـني واني ما دَخّـن
مـو كافي عُـذُر وِتْجَـدّده وِتعـيدْ
النَحَـل ينتج عَسل بَلوان عِـدّه
لاچِن بِلأذه يِـلسع بْكل تأكـيـد
أحَـذْرك للهَـوه هَم إله يُـومه
وِذا بَـرْد ورعَـد باللـيل تهديد
وَجَّهتك هْـوايه وگِـتْـلي أفهـم
طِلَع سَمعَـك ثِگيل صْياح مَيفيد
****
هاي دنيه لا تأمّن مِنهه يوم
ربك يشوفك وَلَو عَنهه بِعـيد
أبد لا تِـغْـتر وْتِمشي مِفْـتخِر
گِلت أصعَـد للنَجِم وانه عَـنيد
يجي يوم ويِنكسر جِنْح وتِگع
وتِنگلب دِنياك عَكْسِ لّي تِريد
هِرِش أصْله مُهم لَمّن تِـثَبته
يبقه ثابت عود وِالقوّه حَديد
لاتغرّنّك حياة الدنيه مَگضيّه
جَهنّم صَعْبة تِسأل مِن مَزيد؟
****
التشاؤم عوفه خَلْ عِندك أمَل
تِنفتح باب الِسمه بْرفعة الإيد
العناد اترْكه تَره ما مِنّه رِجه
لا تْطُخ راس بْجِبل وِتوِن وَحيد
شوف أخبار الدول صاعد نِزل
ولِّي ما ياخذ دَرِس أكبر بَـلـيد
وإلى اللقاء

تنويه: جميع المقالات المنشورة تمثل رأي كتابها فقط