بزمنكم .. كل شريف انذل
_________
الى [ حرامية العراق ] الذين احالوا الحياة الى جحيم , والوطن الى ركام
عباس طريم
بزمنكم .. كل شريف انذل
شنهي الجارة , شنهي
الحل
حقوق الناس اكلتوهه
فلوس الشعب بكتوهه
الارض لحسا لحستوهه
وشعبنه كل شي ما حصل
+ +
الخير عاف ديرتكم
والمنصف شرد منكم
طركاعه وفلك طركم
طعنتو الوطن . في مقتل
+
فليسات الشعب ضاعت
وشباب ابلا شغل داحت
عوايل عازت اوجاعت
بلد من كل فلس وشل
+
وعدكم طار وي الريح
خليتو الشباب اتديح
وابناء البلاد اتصيح
خلف الله عله المحتل
+
متحلفين اجيتونه
الواحد حاد اسنونه
وين الشرده دلونه
تفكر بالفرار , الكل
+
بسم الدين بكتونه
وسلكتونه اوحمستونه
واكلتونه وشربتونه
وبلاء الله وياكم , وحل
+
اتبيعون الرتب بالسوك
شركم , زاد فوك صفوك
والنوب النهب والبوك
بزمنكم .. على شي اتحلل
+
جنتو بلا نعل , حفاي
والشاهد حسن دواي
جان اعله الخبر والجاي
وهسه من المشاوي . مل
+
الشعب ميريدكم , كافي
ولك ملينه , يلحافي
شمالك بويه , متعافي
اخذت المال , وخر ول
+
اجماله اتكول قفاصين
ما الهم شغل بالدين
جانو عالخبز , حافين
ذوله اهل الجكاير فل
تنويه: جميع المقالات المنشورة تمثل رأي كتابها فقط