تُـربة كربلاء
د. حسن كاظم محمد
الحقِـد عند البعض ما مِنّه چاره
مَـيفـيَده نُصُح عَـلْ عَـوَج خَـلّـه
يُـبْـقه طول عُمرَه يِحسـِد الغَـير
وِلـيحسِـد الـغَـير تْعـوفـه لَــلَّـه
عَسير حْسابه مِن توصل مِنيته
الوكِـت يمشي وبعَـد ما إلـَه حَلّه
****
تُـربَـة كَـربَـله شْـمَحلاهه تُـربه
حـيدر مَـر عَـليهه دِعـه وْصَلّه
هِـيّه تربه شَحچي عنهه تْحَيّرِت
شِـفِـت بيهه مِن عجايِـب مُذهله
أبو الـحسنين عِندك علم غَيبي ؟
عِـرَفْـتِ بْكـربَله استشهدت ثُـلّه
سيفك بِالوغه مْعَـرّف بْـحَـدّيـن
مَـحَّـدْ يـوگـف گْـباله إذا سَـلّـه
خَـلْ أنبهَـك يَـلّي قاصد كَـربله
شِم هواهه أباً عـن جِـد مُبتَلَه
خَـل أنبهـك هِـيّه تاريخ وشهيد
تِـشـهده الأجـيال مِن قال وبَلَه
****
أبَو الأحْرار إلَك حوبَه لْعـدوك
مْلازمه طول الوكت عار ومَذلّه
خلّي أسأل عَـلْ جِره ولّي بُقه
زَوِّرو تَاريـخـنَا بْكُـل مـرحـله
خَـلْ أَراويك العدَو لْياحد وِصَل
بْسَهم ضِرِبُو للطِفِل من حرمَلَه
مِن حِقدهم طوّقوهه المشرَعـه
وگِـربِـتك عـَبّاس لازم تِـمتَـلَه
حَوّطَو وِگْطَعَـو ماي المشرعه
بس بقه العباس وحده بالفَلَه
يجول بيهم للی ماعدهم ضمير
عُـذر ماعدهم لأنْهـم سفَـلَـه
بالحوافر سحگو أبناء الرسول
هاي مو معركه بس حِقْد نْجلَه
شوف زينب وگفتَ بْوجه الطغاة
وفضحت أنواع الحَقد والجَهَلَه
ما جــامِل أبَـد وَنْـسَه الـمُـضَه
أذكـرچ ولدمع عَـل وَجنه سِلَه
يجي يوم الحق يسود عْلَ الظلم
ومو صعُـب ربّـك يِحـل المسأله
وإلى اللقاء
Read our Privacy Policy by clicking here