قصيدة / العِـلم والمعرفة

قصيدة / العِـلم والمعرفة
د. حسن كاظم محمد
خَـلْ أنَبْهَـك قِـيمِتَك هِـيَّه الْعِـلِـم
وِلِّي عِندَك مِن مَهَارَه وْمَعْـرِفه
حاول تْـفـيدِ الـبشَـر يـومِ لْـيِـمُر
كون صادِق وَيْ هَلَك وِتْرك جِفَه
لا تْـورِّط نَفْسَك بْشَغلَة الْـغَـير
يِجِي يـوم وْتِبتِلي وْتِفگِد وِفـَه
عَمَل لا تِـقْـبَل إذَا شَكَّيـت بيه
وْدَمِع حَسره مِنِ عْـيونَك تِذْرِفَه
****
گَالَـوِ الإنسان قَـدْرَه بالـعِـلِـم
والذهَـب وِالتاج فوگا زَخْرَفَه
أَبَـد ما غَيّرَت فَـدْ يوم الْحِـلي
جَوهر الإنسان بْصوره مْزيّفه
شِفِتْ كُلهَه تِنتِهي تَحتِ التِرِب
دود يِنخَرْهَه وْمامِش عَجْرَفَه
خَلْ أنَبَهَك دِنيتَك يَوم وتِزول
وِلِّي عِندَك إنتَه بيدَك تِصْرِفَه
كُثُرْ ناس الْجوع لَوَّعههَ بْألَم
باِلإسِم سَمّوهَه ناس مْعـفِّـفَه
****
آنه احِبِّ الطفـل لحظة مَولده
يِبدي علْ فِطره وْربّك يِسعِفه
آنه احبّه مِن مِشه يوم وْوِگع
كِـثرن الوَگـعات لكن مَـكْـتِـفه
يَاخِذ الجِـدّ بْهزل ويده بْـلهَـب
علْ جرف خوفي روجه تِجرفه
ولفُگد أمَّـه وبـيَّه اصبَح يتيم
أدبَه وعِلمَه بُگَه يِضوي لْخِفَه
آنَه خوفي لبُگه ماشي بِالجهل
يُبگَه تايه بالخَلگ ماله صِفَه
آنه ردتك تِـطمئن يوم العُـسُـر
ربّك لْيحمـيك ونـفسك خايِـفه
تْمسّـك بْحَبل العِـلم والمعرفه
والجَهل خَـلّيه سْلَيمه التكْـرفه
وإلى اللقاء

تنويه: جميع المقالات المنشورة تمثل رأي كتابها فقط