د. حسن كاظم محمد
فاجأني ما حدث مؤخراً من حرق القرآن الكريم في السويد في إحدى الساحات العامة كما تناقل الحدث الكثير من وسائل الإعلام بالسلبية والإيجاب وهذا من قبل أحد التائهين. سؤالي هل هذا يعتبر من الحرية أو اعتداءً على مشاعر الآخرين مما يؤدي إلى نتائج سلبية وتفرقة البشر عبر العصور، كما عبرعنه ملايين المسلمين كرد فعل على ما حدث؟ لم أجد تفسيراً مقنعاً إلاَّ فتنةً مقصودةً أو بحثاً عن الشهرة.
خَـلْ أنَبهَـك قِصّتك مش مَرجَـله
تِـحـرگ الـقـرآن گِـدَّام الـمَـلَـه
هاي مش حريّه أگـلّـك بالعَـلَـن
تعتدي عَـلْ ناس بَصْعَـب مَسأله
خَـلْ أنبهك رشدي سوّاها قَـبِـل
تَـيَّه حْسابه وَلا شي حَـصّـله
شِـفِـت آخر راد يتحـوّل خِـبِـل
والخِـبل ماإلـه قـيمه إهـمله
گال أبو الحسنين في حق البشر
بالخَـلِـق واحـد ودينه حُـرْ إله
خَـلْ أنبهك دينك يحب الجميع
ويِـقبل الـكُل وْيحـيّـيك بْهـله
ناس سَدّت عينهه وْصكَّـت إذن
وفسّرو هالأزمه تِجزي بْمرحله
خَل أنبهك وِفهم القرآن زين
وترك اللي يِجهلون البَسمَله
ناس گالت هيّه خِـلّه بالعَـقل
يبقه فاشل کل حَياته وْما عِله
****
هاي مو أوراق خَطّـوهه بْـقَـلم
هـاي دستـورك وربّـك نـزّله
أبَـدْ لا تجرح شعور الآخرين
لا أنَه ولا غيري يقبل مَهزله
هيّه فتنه أنصحك عنهه بْـتعِـد
إذن طرشه طّيهه ذِبهه بْمزبله
هيّه ضد الوطن سمّوهه قِـسِم
ناس گالت إتركوا هـذا البَـله
****
لو چنت جاهل وْما عندك دليل
إفتخِـر قـرآنـك احسَـن مَنزله
لا تنازع عِلم ونته في جَهَـل
هاي معروفه مِن قـال وبَـله
تدري تاجر حرب يوم وينتهي
ويبقه عَـلْ زنجار كاسِر مِنجله
وإلى اللقاء